Errotu leloarekin ospatuko da Bizkaiko Urduñan asteburuan Euskal Eskola Publikoaren 32. jaia. Larunbatean hasiko dira ekintzak eta igandea izango da egun handia.

Larunbatean hainbat jarduera egongo dira, giroa berotzeko igandera begira: 11:00etan, mendi martxa abiatuko da Txarlazo mendi taldearen eskutik; 13:00etan dantza-plaza eskainiko du Erauntsi dantza taldeak; eta 21:00etan, kontzertua emango du Enbata Lorade taldeak.

Lau gunetan banatuta

Domekan izango da ospakizun handia eta jaia lau gunetan banatuko da: herri eskola, Foru plaza, Gernika plaza eta Bolatokia.

Urduña herri-eskolan kokatuko da lehenengo gunea. Bertan Porrotx, Marimotots, Pupu eta Loreren ikuskizuna, Gora bihotzak antzerki musikala eta Hodei magoa izango dira. Horiez gain, jolas kooperatiboak, Kaixu baserria txokoa edota Berria gunea ere egongo dira.

Foru plaza izango da jaiaren bigarren gunea. Bertan Goa!zen, Ingot eta Gozategi taldeak arituko dira. Makusi gunea, Jokai jolasak, giza futbolina eta Diwoen bila ere egongo dira gune horretan.

Gernika plazan kokatuko da bazkari gunea. Urduñako tokiko elikadura-estrategia agroekologikoarekin bat etorriz, bertako elikagaiak protagonismoa izango dute Euskal Eskola Publikoaren jaian, Hazi, ENEEK Ekolurra eta Ekoizpen Urduña zerbitzuaren elkarlanari esker. Hala, tokiko elikagai ekologikoekin prestatutako elikagaiak izango dira.

Bolatokian kokatuko da laugarren gunea. Bertan puzgarriak eta perkusio tailerra egongo dira. Skate pista ere badagoenez, norberak bere skate edo irristailuak ekarri ditzake.

Giroa berotzeko hainbat ekintza ibiltari izango dira kaletan zehar: Reperkusion feminista, Kantuz Kantu otxotearen eskutik, Getxa Goi txistu taldea, Txarlazopeko musikariak eta Urduñako buruhandiak. Gainera, hainbat postu izango dira kale nagusian Aiaraldeako ekoizle eta elkarteen eskutik.

Aparkalekuak eta beste

Hasiera ekitaldia 11:00etan egingo da Urduña herri-eskolan. Garraio publikoa egongo da Renferekin eta Bizkaibusekin eta aparkalekuak ere egokituko dituzte: ikastetxeetatik datozen pertsonak jaitsi eta jasotzeko, zezen-plazan; autoak, industrialdean; eta autokarabanak, Nafarroa kalearen bukaeran.

Atsedenguneak ere egongo dira haurreskolan, herri-eskola ondoko parkean eta zahar-etxearen aurreko
parketxoan.

Eta eguna ondo irten dadin, 150 lagun ibiliko dira boluntario lanetan.