Urko Egañak idatzi eta Leire Derteanok marraztu du Geure mitologia, Potx eta Lotxen ibilerak; bertsoak musikatuta entzuteko eta ikusteko aukera ere ematen du Abao komunikazio agentziarekin argitaratu duten liburuak.

Urko Egaña bertsolaria da, plazetan aspaldian izaten ez bada ere; bertso asko idazten ditu eta lehiaketetan parte hartzen du. Bertsotan eta Leire Derteanorekin batera argitaratu duen bigarrena du.

Ataunen, euskal mitologiaren txoko kuttunean aurkeztu zenuten. Pozik?

Oso pozik! Bi urteko lanaren ostean emaitza txukuna dela esango nuke.

Nola abiatu zenuen proiektua?

Nire haurren andereño batek proposatu zidan ea animatuko nintzen kopla batzuk egitera mitologia gaia lantzeko eskolan, eta hala idatzi nituen. Eskolan landu ondoren, guraso batzuek baimena eskatu zidaten bertso horiek erabiltzeko, eta geroago, beste irakasle batek kopla horiekin liburuxka bat egiteko asmoa azaldu zidan; hori horrela, Leireri proposatuta, proiektuari heldu genion

2012an elkarrekin egin zenuten 11 kantatzeko liburua. Nor da Leire?

Oñatiarra da. Ausardia handirik ez du izan orain arte marrazteko dohainak erakusteko, baina aurreko liburuarekin eta honako honekin ere sobran erakutsi du nahi izanez gero ilustrazio arloan beste urrats bat aurrera eraman dezakeela.

Proiektua handitzen joan da bidean; tartean, Potx eta Lotx batuta.

Hala da; lagun moduan iritzi bila joan nintzen Josu Zubiarengana, Potxengana, ea hark proiektuari zerbait gehitu ahal zion galdetuta, eta etxeko atea zabaldu zigun. Beste mundu batean sartu ginen orduan eta ibilbide zoragarria izan duen proiektua izan da gero, bidelagun asko izan dituena.

Bertsoak musikatuta entzun ahal dira liburuan dagoen QR baten bidez. Zelan egin duzue?

Josuk hartu du musika arlo guztiaren ardura, hark sortu ditu konposizio guztiak. Goizean goiz jeikirik doinua erabiltzea zen Leirek eta biok genuen hasierako asmoa, baina Josuk pertsonaia bakoitzari doinu horren bertsio bat eman digu gero. Arlo musikala grabatzeko Josuk bidelagun izan ditu Arantzazu Jauregialtzo akordeoi-jole eta Olatz Amozarrain flauta eta piccolo-jole oñatiarrak eta baita Oriol Flores bateria-jolea ere. Bost minutuko audio hori deskargatzeko aukera dago.

Beste QR batek eramango gaitu ikus-entzunezkora. Zelakoa da?

Bertsoen audio hori Leire Derteanoren irudiekin ikusiko dugu; irudi horiei nolabaiteko bizitza eman diegula esango nuke.

Keinu hizkuntzan ere badago.

Sinbolikoki izateaz gain, moralki ere garrantzi handia du guretzako; izan ere, euskara hizkuntza gutxitua da eta are gutxituagoa da keinu hizkuntzaren arloan, eta ezin dugu ahaztu hizkuntza hau erabiltzen duen komunitate handia dagoela. Kasu honetan, Arantxa Martinen laguntza izan dugu ikus-entzunezkoan keinu hizkuntzan jarduteko. Martinek, gainera, pertsonaiei buruzko hiztegitxo bat ere egin du.

Zelako pertsonaiak daude?

Denoi burura etorriko zaizkigunak daude: Tartalo, jentilak, sorginak, laminak, galtzagorriak… Baina badaude hain ezagunak ez diren beste batzuk ere; esaterako, Traganarru: itsaso haserretu baten jokaeraren adierazle moduan definitu daiteke.

Non dago liburua eskuragarri?

Hainbat modu daude erosteko: Potxetalotx.eus atarian, Elkar dendetan eta eskualdeko beste hainbat liburu-dendatan ere bai.

Aurkezpenean antzezlan bat egin zenuten. Gehiagotan eskaintzeko asmorik?

Ataungo Jentil Baratza Kultur Elkartekoek proposatu ziguten elkarrekin ordubete inguruko ikuskizun bat prestatzeko, eutsi egin genion erronkari ere eta ederra atera da! Gehiagotan eskainiko dugun ez dakigu, ikusi egin behar! Geure mitologia ateak zabalik dituen proiektua dela erakutsi dugu egindako bidean.

Iturria: Goiena.eus.