Haur minbizia 1 eta 14 urte artean dauden haurren heriotzaren bigarren arrazoi nagusia da istripuen ondoren, eta gaixotasunari deritzona, lehengoa. Normalean, kokaleku anatomiko sakonak ditu, eta, beraz, diagnostikoa ustekabean edo gaixotasunaren fase aurreratuetan egin ohi da. Helduen minbiziak baino sendatze-tasa handiagoa dute, eta diagnostikoa egin eta 5 urtera % 80ko biziraupena dute.

Euskal Autonomia Erkidegoan 70 kasu berri diagnostikatu ziren 2025ean. Leuzemiak jarraitzen du izaten haur minbizi mota ohikoena. Ondoren datoz nerbio-sistema zentraleko tumoreak, hozi tumoreak, gibelekoak, giltzurrunekoak, begietakoak eta hezurrekoak. Haurtzaroan gaixotasunak eragindako heriotza-kausa nagusia da, baino itxaropenaren mezua ere hor dago: gaur egun bizi-iraupen tasa %80-85 da.

Haur Minbiziaren Aurkako Eguna, otsailaren 15ean

Datu hauek eskuetan heldu da Haur Minbiziaren Aurkako Nazioarteko Eguna. Otsailaren 15ean aldarrikatzen da eta Aspanogik –Adingabe Minbizidunen Gipuzkoako Familien elkartea– sentsibilizazio kanpaina zein urteroko elkartasun ipar martxa iragarri ditu. Helburu nagusia da adingabe minbizidunen eta horien familien bizi kalitatea hobetzea gaixotasunaren berri jasotzen duten unetik baliabideak eskainiz.

Aurtengo leloa da: Etxean zaintzea eskubide bat da. Etxeko zainketa aringarri pediatrikoen alde. “Adingabeak eta haren familiak zainketa aringarriak jasotzen dituzten unea iristen denean, arreta hori ematen den lekuak garrantzia hartzen du. Etxea bada, arreta espezializatua, etengabekoa eta kalitatezkoa bermatu behar da. Ezinbestekoa da profesionalez osatutako pediatria taldea egotea –medikuntza, erizaintza, psikologia, gizarte lana eta laguntza espirituala–. Helburua ez da soilik osasun arretan: entzun, ulertu, arindu eta kontsolatu ere egin behar da”, azaldu dute Aspanogitik.

Zaintza hori eguneko 24 orduetan eta urteko 365 egunetan eman behar da, eta familiek jakin behar dute ez daudela bakarrik. Bestetik, adingabe guztiek eskubidea dute diagnostikotik hasi eta tratamenduaren amaieraraino berme guztiekin zainduak izateko.

Ipar Martxa otsailaren 22an

Aspanogik sentsibilizazio kanpaina egingo du aurten ere; ikastetxeetan, Udaletan, bestelako erakudeetan. Eta elkartasunezko Ipar Martxa ere egingo dute otsailaren 22an, Donostian. “Gizartearen partaidetza bultzatu nahi dugu elkartasun ekintza honekin”, esan dute.

Martxa adin guztietako pertsonek egin dezakete, ez da kirolaria izan behar. Elkartasun martxa bat da, ez lasterketa bat eta zabalik da izen-ematea hemen. Izen-emate digitala otsailaren 19an itxiko dute. Egunean bertan, ordea, egongo da apuntatzeko aukera. 14 urtetik gorakoek ordaintzen dute eta 10 euro dira.

Egun osoko egitaraua

Ipar Martxaren bueltan egun osoko egitaraua iragarri dute Aspanogiko kideek. 09:30ean hasiko dira ekintzak eta Maria Jose Villalba entrenatzaileak gidatutako beroketa ariketak, Porrotx pailazoaren eta Legion 501en laguntza, Photocall txiki bat eta martxa bera –11:00 Saguesetik abiatuta– izango dira ekitaldi nagusiak.