Uste orokorraren arabera zenbat eta lehenago hasi atzerriko hizkuntza bat ikasten, hobe

Hizkuntzen irakaskuntza txikitatik hasteak merezi du? Eta komeni da? Gogoeta egiten dute gaiaren inguruan Hik Hasi aldizkarian, izan ere, fenomeno berri bat sortu da: gero eta guraso gehiagok erabakitzen dute beraien seme-alabak txiki-txikitatik hinzkuntza-eskolara eramatea. Uste orokorraren arabera, errazago eta hobeto ikasten dute haurrek hizkuntza, eta gainera, abantaila emango die etorkizunean lan munduan.

Hik Hasi aldizkarian jaso dutenez gurasoen eta hezitzaileen artean askotariko jarrerak antzematen dira, baina nagusiki bi multzotan banatzeko modukoak. Batzuen ustez, zenbat eta lehenago hasi ikasten, errazagoa izango da, hobeto ikasiko dute eta, gainera, onurak ekarriko dizkio etorkizuenan. Besteen ustez, haurrak baditu bestelako premiak hain txikia denean, eta gainera, atzerriko hizkuntzaren irakaskuntza goiztiarrak kalte egin diezaioke bestelako jakintza batzuk bereganatzeko orduan.

Eleaniztasunaren Nazioarteko Elkarteko presidentea da Jasone Cenoz eta hainbat ikerketa egin ditu eleaniztasunaren inguruan. Gaia aztertzeko bi eremu bereizten ditu: eremu naturala eta eremu formala. Eremu naturalean haurrak modu masiboan eta etengabean jasotzen du hizkuntza. Eta egia da zabalduta dagoen ustea: hobeto eta errazago ikasiko du hizkuntza 4 urteko haur batek 10 urteko senide zaharragoak baino. Baina eremu formalean, hau da, ikastetxean edo hizkuntza-eskolan ikasten badu, ez dago zantzurik esateko hobeto ikasiko duela 4 urterekin hasita, 8 urterekin hasita baino.

Ildo beretik mintzo da Angelika Kubanek-German, Alemaniako Eichstätt unibertsitateko katedraduna. Atzerriko hizkuntza txikitan ikasten hastea ez da ezinbestean abantaila izango, beste faktore batzuekin indartzen ez bada behintzat; adibidez, hizkuntza horrekin duen kontaktua areagotuta edo kalitatezko irakaskuntza bermatuta.

Haur txikientzako hizkuntza eskolak ematen dituzte adituekin ere izan dira Hik Hasi aldizkariko erreportajean. Gakoa, ama hizkuntza ikasteko prozesua imitatzea dela diote, besteak beste.

Eraginkorra izanda ere, komenigarria?

Haurren garapenean aditua den Alvaro Beñaran adituak beste enfoke bat ematen dio auziari: eraginkorra izanda ere komenigarria da hizkuntzen irakaskuntza txiki-txikitatik hastea? Ezezkoan dago Beñaran. Adin horretan gakoa, haren ustez komunikatzea da, ez hizkuntza asko ikastea. “Zer da inportanteena, haurrak asko ikastea? Ikasle bilakatzea?”. Umea errespetatu egin behar dela dio. “Bizipena atsegina bada eta, bidez batez, hizkuntza ikasten badu, primeran. Baina ikastea ondorioa izango da, ez helburua”.

Beñaranek gogorarazten du nola edo hala exijentzia bat doala lotuta hizkuntza-eskolako saioekin batera. “Urtebeteko haurra ingelesera eramaten badut, helburua da ondoren berak ondo hitz egitea ingelesa. Kontuz dinamika horrekin, hain txikia izanik gehiegizko exijentzia izan daiteke. Iritsiko da horretarako momentua”, azaltzen du.

Albistearen eta argazkiaren iturria hemen.