Virginia Imaz: “Ahozkotasuna odolean daramatenak joaten ari dira, ez badugu erreleborik hartzen ondare garrantzitsu bat galduko dugu”

Ahotik Bihotzera antolatu dute larunbaterako, apirilak 17, Antzuolan (Gipuzkoa). Ahozkotasunaren festa da, eta hirugarren urtez antolatu dute Oihulari Clown taldeak eta Antzuolako Udalak. Oihulari Clown taldeko Virginia Imazek ahozkotasunaren garrantzia azpimarratu du. Egitaraua, apirilaren 17an, 13:00etan hasiko da.

Zergatik da hain garrantzitsua ahozkotasuna?
Gure identitatea da, gure oroimena eta ezin dugu galdu. Ez da profesionalen kontu bat, herriaren kontu bat da. Gaur egun istorio ia guztiak irakurri egiten ditugu edo telebistak kontatzen dizkigu. Ez ditugu lehen moduan entzuten. Eta nire ustez pena handia da hori. Afrikan esaten dute aitona edo amona bat hiltzea dela liburutegi bat erretzea moduan.

Indartsu ikusten duzu ahozkotasuna gurean?
Aurrekari historikoak ditugu. Koldo Amestoi edo Pello Añorga, esaterako, oso garrantzitsuak izan dira euskararentzako eta euskarazko ahozkotasunerako. Berpiztu egin zen ahozkotasuna orain 20-25 urte eta batzuk horrela ikasi genuen euskara, euskara maitatzea, herriko istorioak gozatzea… Baina belaunaldi aldaketa egon da eta arriskua badago. Gure zahar-zaharrak, telebistarik gabe bizi izan zirenak eta ahozkotasun hori odolean daramatenak joaten ari dira eta ez badugu erreleborik hartzen ondare garrantzitsu bat galduko dugu.

Ahotik bihotzera ekimenaren helburua da ahozkotasunari dagokion garrantzia ematea, ezta?
Hori izan da gure helburua betidanik: ahozkotasuna berpiztea, mantentzea eta transmititzea ondorengo belaunaldiei. Gure artean oraindik badaude ipuinak, kondairak, erromantzeak, bertsoak… dakizkiten aitonak eta amonak. Hiltzen badira eta ez badugu erreleborik hartzen galdu egingo ditugu horiek guztiak.

Eta zer berezitasun du ahozkotasunak?
Istorio asko irakurri egiten ditugu, eta ez dago lehiakortasunik ahozkotasunarekin baina ezberdina da. Ahozkotasunak beste zapore bat dauka. Idatzitakoa oso perfektua da, oso polita eta neurtua baina ahozkotasunean keinuak, eskuak eta begiradak dauzkazu eta esaten ez duzuna horrek kontatzen du.