Solasaldia egingo dute maiatzaren 6an, Arrasateko Kulturateko Jokin Zaitegi gelan, 17:30ean hasita, 12-18 urte arteko seme-alabak dituztenei zuzendutakoa. Izena emateko aukera, hemen.

Guk, Emokiko kide den Ainhoa Arruabarrenarekin hitz egin dugu saioa kokatzeko.

Aurrez, Haurrak eta pantailak: erabilera kontzientea eta onuragarria sustatzeko solasaldia egin zuten astelehena, Arrasateko Kulturateko areto nagusian, Emoki elkarteko kideak izan ziren kasu honetan ere gidariak.

“Heldu moduan, gu gara haurren eredu, eskolan, familian, guraso moduan edota lagunekin, eta haiek egingo dute guk egiten duguna. Kontzientzia hartu behar dugu, mugikorraren erabilera sutsua egiten dugulako guk ere”

Jone Zalduegi

Zalduegiren esanetan, inportantea da nola harremantzen diren helduak eta harremantzeko “berehalakotasun” horrek nola eragiten dieten aisialdia orekatzeko. “Garbi dago etxeko esparrua izan beharko litzatekeela sostengurik handiena. Baina espazio hori nolakoa da haurrarentzat? Segurua da? Gure jokabideak egokiak dira haientzat?”, azaldu du. “Batzuetan, badirudi kosta egiten zaigula haurrak etxetik ateratzea, tabletarekin egon gura dutelako edo bideo-jokoekin, eta gu eroso gaude egoera horretan, guk ere ez daukagulako motibaziorik edo estresatuta gaudelako. Hain zuzen, erosotasunaren eta erruaren arteko oreka horren inguruan ere aritu ginen”.

Askotan, aspertuta daudelako erabiltzen dute haurrek sarea, ez dakitelako zer egin, Zalduegiren arabera. “Orduak eta orduak pasatzen dituzte sarean, eta hor dago koxka, denbora asko pasatzen dutelako sarean eta gauza asko ari direlako galtzen”.

Hori dela eta, haurrak motibatzearen garrantzia azpmarratu du. “Nekatuta edota estresatuta egon gaitezkeen arren, guraso bezala, motibatu egin behar ditugu eta hondartzara, mendira, bizikletan ibiltzera edo beste edonora eraman, nahiz eta haiek kexatu. Gu gara sokatik tiratzen dugunak eta horretaz kontziente izan behar gara, horrek seme-alabengan daukan garrantziaz”.

Mugak, baina malguak

Zalduegik onartu du atzoko saioan hainbat kezka azaldu zituztela gurasoek, etxean hainbat ohitura edo muga ezartzeko ardurari buruz. “Haurrari muga bat jartzen diozunean garbi eduki behar du haurra denetik, eta ez nagusiago egiten denean. Demagun, 20:00etatik aurrera mugikorrik ezin badu erabili, garbi izan behar du hori eta bere logelan, esaterako, ezin du pantailarik izan. Haurrak bakarrik ez, gurasoek ere argi izan behar dute”.

Bestalde, jartzen diren muga horiek ere malguak izan behar direla nabarmendu du. “Muga zehatzak jarri behar dizkiegu gure seme-alabei, baina muga horien malgutasuna neurtuz. Izan ere, debekatzen dugunak zirrara sortzen du eta horrekin kontuz ere ibili behar gara. Gainera, muga horiek eguneratzen ere joan behar gara, identitateak ere aldatzen doazelako”.

Adina eta intimitatea

Adinaren eta legearen afera ere hor dagoela ohartarazi du Zalduegik, haien intimitatea ere aintzat hartu behar delako. “14 urtetik aurrera beste muga batzuk ditugu eta mugikor bat ematen diogunean, ezin dugu berak egiten duen guztia kontrolatu, errespetatu egin behar dugu. Horregatik da hain garrantzitsua lanketa aurrez egitea, jokabide horiek kudeatzen ikasteko”.

Zalguegik azpimarratu duenez, ez du “ezertarako” balio pribatutasunari buruz sekulako hitzaldia ematea seme-alaberi, berak ez baditu erremintak bere pribatutasuna kudeatzeko eta ez badu bere identitatea ahalduntzen, modu batean edo bestean jokatzeko. “Sare eta bideo-jokoek ez dute errazten prozesu hori behar den erritmoan egitea, oso azkar doazelako eta informazio gehiegi dagoelako sarean”.