Zer nolako umeak utziko dizkiogu naturari?

Gero eta gehiago dira naturaren garrantzia aldarrikatzen duten proiektu hezitzaileak. Horietako bat da Ozetako (Araba) Plisti Plasta heziketa gunea. Bertako arduradun pedagogiko Andrea Lopez de Parizak eman dizkigu xehetasun gehiago.

Naturan kokatzen den heziketa espazio bat moduan definitzen duzue Plisti Plasta. Garrantzi handia ematen diozue haurtzaroan naturarekin harreman zuzena edukitzeari.
Naturan ibiltzea da guretzako oinarri pedagogiko garrantzitsueneko bat. Ulertu dugu eremu itxiek ezin dutela umeek garapenerako behar duten espazio eskaini. Alde batetik garapen motoreari dagokionean eta bestetik bizi izaten diren esperientziei dagokionean. Integrazio sentsoriala, arriskuaren balorazioa, basoaren parte sentitzea… garrantzitsuak direla uste dugu. Natura laborategi bizi bat da. Bertan, animaliak, landareak, zuhaitzak… aurki ditzakegu. Ura ere bai bere modu ezberdinetan. Ikaskuntza prozesu oso garrantzitsuak ziurtatzen ditu naturak.

Zein da zuen egunerokoa?
Ozetan (Araba) gaude eta gure proiektua bi urte eta erdi eta sei urte bitarteko neska-mutikoei zuzendutakoa da. Ikasturte honetan 15 neska-mutiko ditugu eta astelehenetik ostiralera goizero elkartzen gara. Basoan ematen dugu goiz guztia.

Euria eta hotza dagoenean ere bai?
Bai. Norvegian esaten dute ez dagoela eguraldi txarrik, ekipo txarrak baizik. Eta gu prestatuta joaten gara basora. Umeek katiuskak eta petoak elkartuta dituzten ekipo iragazgaitzak dituzte. Badago materiala hori. Eta hotz dagoenean arropa aproposak janzten ditugu. Termikoak.

Frontoia ere badugu euri asko asko asko egiten duenerako eta bertan areto txiki bat, baina ez dugu 11:30ak 12:00ak baino lehen erabiltzen. Euriarekin egiten dugu jolas, edo izotzarekin eta esperientzia oso politak izaten dira. Batzuetan izotza lodia da eta beste batzuekin ez dago. Batzuetan elurra dago. Eta zer gertatzen da izotza elurretan gordetzen dugunean…? Horrelako gauzak bizitzen ditugu.

Zuena ez da hezkuntza gune ohikoa. Edukiei zein garrantzi ematen diezue?
Plisti Plasta-n garapen emozionalari ematen diogu garrantzia. Hau da umeak behar du segurtasunezko giro emozionalari eta jaiotzez ekartzen duten barne plana garatzeari.

Ulertzen dugu, baita ere, adimena garatzeko 0-6 urte bitarteko umeek materialez egituratutako esperientziak behar dituztela. Adin horrekin materiarekin kontaktu zuzenean badaude 6 urtetik aurrera errazago barneratuko dituzte ohiko jakintza akademikoak eskuekin bizitako esperientziekin garatu dituztelako konexio neuronalak.

Inork zuen proiektua ezagutu nahiko balu, nora jo beharko luke?
Egiten ditugu ate irekiak eta badugu helbide elektroniko bat: plistiplastanaturan@gmail.com. Bloga ere badugu: plistiplastanaturan.wordpress.com. Familia handitzea espero dugu!

Azken gogoeta bat, Andrea?
Bai. Askotan arduratzen gara zer nolako natura utziko diegun gure umeei eta ez gara arduratzen zer nolako umeak utziko dizkiogun naturari.

Andrea Lopez de Parizari egindako elkarrizketaren audioa entzungai