Zigor fisikoa debekatzeko lege proposamena eztabaidagai Frantzian

Gaiak debatea eragin du Frantziako Asanblea Nazionalean, eta mahai gainean da oraindik ere. Oraingoz, eguneratu egin dute gurasotasunaren definizioa Frantziako Kode Zibilean. Betekizunen atalean gehitu dute baztertu egiten direla “trataera krudel, iraingarri edo umilgarri guztiak, zigor fisikoa barne”.

Albisteak bidea eman digu gaia mundu mailan zein egoeratan dagoen aztertzeko kontuan hartuta, beti ere, gauza bat dela legeak dioena eta bestea legea bete arazteko ipintzen diren neurriak.

2014an Europako Kontseilua osatzen duten 47 Estatuetatik 27 dira umeen aurkako zigor fisikoa legalki debekatzen dutenak, eta Association End corporal punishment of Children erakundeak emandako datuen arabera 44 Estatu dira mundu mailan.

Suedia izan zen lehenengoa pausoa ematen, 1979an. Jarraian etorri ziren Finlandia (1983) eta Norbegia (1987). Europa iparraldeko herrialde gehiagok hartu zuten erabakia ondoren, tartean Austriak (1989), Danimarkak (1997) eta Alemaniak (2000). Horiekin batera Europa Ekialdeko hainbat herrialdetan eman zuten pausoa: Letonian (1998), Kroazian (1999) edo Bulgaria (2000).

Hego Ameriketan ere hainbat herrialdek hartu dituzte neurriak umeen aurkako zigor fisikoa debekatzeko: Uruguaik eta Venezuelak (2007). Ondotik, Costa Ricak, Hondurasek, Brasilek eta Argentinak. Afrikan ere onartuta dute araudi berezia Togon, Kenian, Kongoko Errepublikan edo Iparraldeko Sudanen.

Anglofonoak diren herrialdeetan Zeelanda Berria izan zen zigor fisikoa legez debekatzen lehenengoa, 2007an. Ameriketako Estatu Batuetan eta Erresuma Batuan uko egiten diote. Gehitu beharra dago AEBko 19 Estatutan oraindik ere legezkoa dela neska-mutikoei ikastetxeetan zigor fisikoak ezartzea.

Iturriek aipamen berezia egiten dute Belgikarekin eta Italiarekin. Zigor fisikoa debekatzen duen legea onartua dute, baina askok oso lege anbiguotzat jotzen dituzte.

Legearen onarpena munduan

1979tik 2016ra mundu osoko 49 Estatutan hartu dituzte neurriak umeei ezarritako zigor fisikoa debekatzen duen lege bat onartzeko.

Suedia (1979), Finlandia (1983), Norvegia (1987), Austria (1989), Zipre (1994), Danimarka (1997), Letonia (1998), Kroazia (1999), Bulgaria (2000), Alemania (2000), Israel (2000),  Turkmenistan (2002), Islandia (2003), Ukrainia (2004), Errumania (2004), Hungaria (2005), Grezia (2006), Herbehereak (2007), Zeelanda Berria (2007), Portugal (2007), Uruguai (2007),  Venezuela (2007), Togo (2007), Espainia (2007), Costa Rica (2008), Moldavia (2008), Luxenburgo (2008), Liechtenstein (2008), Tunisia (2010), Polonia (2010), Kenya (2010), Albania (2010), Kongoko Errepublika (2010), Hego-Sudan (2011), Honduras (2013), la Mazedonia (2013), Malta (2014), Brasil (2014), Bolivia (2014), Cabo Berde (2014), Argentina (2014), Saint-Marin (2014), Estonia (2014), Nikaragua (2014), Andorra (2014), Benin (2015), Irlanda (2015), Peru (2015), eta Mongolia (2016).

Albistearen hasierara bueltatuz, Frantziako Asanblada Nazionalean bakarrik ez, gaiak debatea sortzen du orokorrean, eta ez soilik lege mailan. Gurasoen artean pil-pilean dagoen kontua da.

Maparen iturria eta informazio gehiago hemen.

Argazkiaren iturria hemen.