Bai Nafarroa eta bai Euskal Autonomia Elkartea (EAE) gaur sartu dira bigarren fasean. Hainbat aldaketa ekarri ditu horrek baimendutakoen artean zehaztuta dauden irizpideetan, eta aldaketak ez dira berdinak lurralde historiko batean zein bestean.

Bai Nafarroan bai EAEn deuseztatuta gelditu da alarma egoera indarrean sartu zenetik mantendu den ordubeteko epemuga. Hala, 14 urtetik beherako neska-mutikoek aire zabalean denbora gehiago ibiltzeko aukera izango dute aurrerantzean, bai Nafarroan bai EAEn. Azken asteotan kezka iturri zen neurri hori, eta indar handia hartzen ari zen eskaeretako bat zen hori deuseztatzea.

Maskaren edo musukoen erabilerari dagokionean derrigorrezkoa da 6 urtetik gorakoentzako. Jarri beharko dituzte bai leku itxietan bai bi metroko distantzia soziala mantentzerik ez dagoen aire zabaletako eremuetan ere.

Nafarroan

Bestelako irizpideak, ordea, ez dira berdinak lurralde batean zein bestean. Nafarroan kalera bakarrik irteteko aukera izango dute 14 urtetik beherakoek. Hori bai, ezingo dira kalera irten pertsona nagusientzako ordu tarteetan: 10:00etatik 12:00etara eta 19:00etatik 20:00etara. “Aiton-amonak eta bilobak ezingo dira batera irten paseoan egitera edo kirola egitea; izan ere, ez dute ordutegi tarte berdina”, azaltzen du Nafarroako Gobernuak (gazteleraz).

Kirol jarduerari dagokionean, 14 urtetik beherako nafarrek 70 urtetik beherakoen baldintza berdinak dituzte orain.

Euskal Autonomia Erkidegoan

Araban, Bizkaian eta Gipuzkoan beste berezitasun batzuk daude 14 urtetik beherakoen joan-etorriei dagokienean. Herrizaingo Saileko prentsa bulegotik helarazitako informazioaren arabera adin horretako neska-mutikoak lagunduta irteten jarraitu beharko dute EAEn. Jarduera fisikoaren gaineko bigarren puntuan jasota dator: “14 urtetik beherako haurrak bizikidetza-unitatearekin atera ahal izango dira, edo, gutxienez, pertsona heldu arduradun batekin, ordu-tarterik gabe”.

Jolas-parkeak, bestetik, itxita jarraituko dute: “Ezin izango da aire zabaleko haurrentzako jolas-espazioetara sartu”.

“Federatutako 14 urtetik beherakoek eta 70 urtetik gorakoek egunean bi aldiz egin ahal izango dute kirola, ordutegi-mugarik gabe, bizilekua finkatuta dagoen udalerriari dagokion Lurralde Historikoaren barruan, bai eta beste lurralde historiko bateko udalerri mugakideetan ere, entrenatzailerik gabe. Hau da, federatutako gainerako kirolarien prerrogatiba berberak dituzte”.

Argazkia: Jesus Rodriguez