Gurasotasunarekin batera aldatu egiten gara pertsona moduan; batzuongan aldaketa sakona izaten da, besteetan arinagoa. Moldatu, ikasi, des-ikasi, oreka aurkitu, beldurtu, ilusionatu… Bestelako helburuen artean prozesu horretan bidelagun izatea izan da gure helburua aurtengoan ere.

2020ak gainera erronka izugarria jarri digu mahai gainean, lehen aldiz mundu mailako pandemia batean bizi gara, eta honi erantzun behar izan diogu jendarte moduan.

Ezjakintasunean, itxialdia; gure beldurrak eta gure txikien izuak, nahiak, ezin egonak… kudeatu behar izan ditugu. Hezitzaile eta hezkuntza sistemako langileentzat ere egoera ez da erraza izan. Guk gure aldetik guraso eta hezitzaileei zuzendutako hausnarketa, albiste eta baliabideak argitaratzen jarraitu dugu.

Kolaboratzaile sareko kideei esker 53 artikulu argitaratu ditugu, beraien iritzi artikuluetan hezkuntza eta hazkuntza gaiak gogoeta eta ebidentziak irakurri ahal izan ditugu, eta urtekari moduan bildu ditugu. Pandemiaren gaiak sortutako hausnarketak izan dira asko eta asko. 53 kolaborazio, gai oso ezberdinak ikuspegi ezberdinetatik landuak.