Apirilaren 5etik 7ra bitartean Wikimedia+Hezkuntza nazioarteko lehen konferentzia egingo dute Donostian. Mundu osoko 50 herrialdetik etorritako 130 pertsonek hartuko dute parte eta guztira 50 aurkezpen baino gehiago izangodira. Wikipediak, Wikipediaren inguruko proiektuek eta hezkuntzak duten harremana izango dute aztergai.

Irekierarako, apirilaren 5ean, hitzaldia egingo du Mary Burnsek Donostiako udaletxeko areto nagusian, 18:45ean. Burnsek 100 argitalpen baino gehiago ditu, eta munduko kontinente guztietan lan egin du hezkuntza curriculumen garapenean. Aditua da irakasleen formakuntzan zein hezkuntzaren erronka berrien inguruan.

Larunbata, apirilak 6, konferentziako egun nagusia izango da eta Katherine Maherren hitzaldiarekin emango diote hasiera. Wikimedia mugimenduan hezkuntzak duen paperari buruz arituko da Wikimedia Fundazioko zuzendari exekutiboa Tabakaleran.

Eta egun osoan zehar hitzaldiak, eztabaida saioak, ikastaroak eta posterren erakusketa izango dira. Lau eremutan banatuta, Tabakalerako laugarren solairuan egingo dituzte ekintza horiek guztiak. Zuzeneko itzulpena eskainiko dute ingelesaren eta euskararen artean.

Igande goizean Wikimedia 2030 estrategian hezkuntzak duen paperari buruz eztabaidatuko dute, eta ondoren berriro ere lau eremu ezberdinetan banatuta ikasteko eta eztabaidatzeko aukera izango da.

Eguneko programa osoa hemen.