6-59 hilabete bitarteko haurrak gripearen aurka txertatzeko aukera egongo da aurten

Osakidetzak irailaren 25ean eman zion hasiera gripearen aurkako aurtengo txertaketa kanpainari. Berrikuntzen artean da 6 eta 59 hilabete bitarteko haurrak gripearen aurka txertatzeko aukera egongo dela aurten lehen aldiz.

“Gripea birus batek eragindako gaixotasun infekzioso bat da, eta pertsonek erraztasunez kutsa dezakete elkar, arnas jariapenarekin, eta, era berean, eskuen bitartez”, azaldu du Ainhoa Gochi medikuak. “Sintoma nagusiak sukarra, eztula, sudurreko mukiak, eztarriko mina, eta giharretako zein buruko mina dira; halaber, kasu batzuetan muturreko larritasunekoa izan daiteke, edo bakterioen sobreinfekzio larriarekin ere egoera zaildu daiteke. Gripearen kontrako txertoa da irtenbiderako modurik eraginkorrena”.

Gochik emandako datuen arabera gripearen urteroko izurriteak haurren biztanleriari eragiten dion proportzioa altua da; %30 eta %40 artean. “Uste da haurtzaroan infekzioa arina izaten dela, eta oinarrizko gaixotasuna duten pazienteei eragiten diela gehienbat. Gripea da mundu guztiko 5 urtetik beherako haurretan izaten diren milioi bat kasu larrietatik gorako eragile, eta gripe larriarekin ospitalera eramaten dituztenen tasak 65 urte edo gehiagokoen antzekoak dira, 79 urtetik gorakoen salbuespenarekin”.

Espainiako Pediatria Elkarteko Txertoen Batzorde Kontseiluak 6 eta 59 hilabeteko haurrak txertatzea gomendatzen du. Dosi bakarra emango da, lehenengo aldiz hartzen dutenak barne, arrisku-talde bateko kide ez baldin badira; horiek bigarren dosi bat jasoko dute 4 asteetara.

“Gripearen aurka haurren txertaketa unibertsalaren gomendioa Covid 19-aren pandemia baino lehenagokoa da. Duela urte batzuetatik, Osasunaren Mundu Erakundeak eta agentzia erregulatzaile internazionalek 6 eta 59 hilabete bitarteko haurrak txertatzeko lehentasuna izan dezaten gomendatzen dute. Espainiako Pediatria Elkarteko Txertoen Batzorde Kontseiluak 2021. urtean bere urteroko gomendioak handitu zituen, eta osasun agintariei eskaera egin zien, adin tarte horretan, txerto hori txertaketa egutegian sartzeko. Eusko Jaurlaritzako Osasun Sailak, urte honetatik bertatik, gripearen aurkako txertoa 6 hilabete eta 5 urte bitarteko haurrengana zabaldu du (…) Ikerketek argi erakusten dute adin tarte guztietan morbilitatea eta heriotza-tasa jaistea lortzen duela, batez bere, haurrengan. Osasuntsu dauden haurrei txertoa jartzeak ere erakutsi du zeharka transmisioa ekiditen duela, gizarteko beste gizatalde batzuetan ere, besteak beste, jende nagusiarengan, immuno-deprimituengan eta 6 hilabete baino gutxiagokoetan. Aktibo ez dauden txertoen kasuan, kontrako efekturik ohikoena erreakzio lokala da, txertoa jartzen den tokian mina eta gorritasuna izanda. Beste kontrako efektuak sukarra, mialgia eta nekea dira, egindako ikerketen arabera, kasuen %5 eta %20 bitartean”.

Argazki nagusia: bristekjegor