Gipuzkoan, gaur egun, 414 neska-mutiko daude harrera-familietan, baina beste 60 familia behar direla azaldu du gaur goizean egindako agerraldian Gizarte Politikako foru diputatu Maite Peñak.

Hala, Gipuzkoako Foru Aldundiak Ikusezinak izeneko kanpaina aurkeztu du babesgabetasun egoeran dauden haurrak ikusgarri egiteko. “Kanpaina honen bidez, 60 harrera-familia lortu nahi dira hainbat arrazoi direla medio beren familietan bizi ezin dutelako harrera-familia bat behar duten haurrentzat. Gaur egun, Gipuzkoan, 414 haur eta gazte bizi dira harrera-familietan; horietatik 338 adingabeak dira, eta beste 76k harrera-familietan bizitzen jarraitzen dute adin nagusikoak izanagatik”.

Neska-mutiko horiek bizi duten egoera ez ezagutzeak gizartearentzat ikusezin bihurtzen dituela azaldu du Peñak. “Gipuzkoako Foru Aldundiaren familia-harrerako programak 31 urte betetzen ditu aurten. Lurraldean babesgabetasun egoeran dauden haur eta nerabeek zailtasun handiko errealitateak dituzte beren familietan. Batzuetan, arazo horiek hain dira larriak, ezinbestekoa baita adingabe horiek beren familiatik kanpoko ingurune batean zaintzea. Guztiek ez dituzte behar berberak, baina familia baten berotasuna behar dute, eta, aldi berean, familia biologikoarekin harremana izaten segi, haiekin bizi ezin badute ere”.

Ikus-entzunezko bat programako kideekin

Minutu pasatxoko ikus-entzunezkoa aurkeztu du Peñak agerraldian. Hainbat lagun agertzen dira bertan. “Protagonistak harrera-familiak dira –haurrak, gurasoak, anaia-arrebak…–, eta baita Izeba proiektuan parte hartzen duten familiak ere. Saiatu gara erakusten, ikusgarri egiten, badaudela harrera-familia baten beharrean dauden haurrak, eta laguntzeko hainbat modu dagoela, gainera”. Izeba proiektuaren bitartez, adibidez, familiek izeba-osaben rola hartzen dute, egoitza-harreran bizi diren adingabeek dituen prozesuei laguntzeko. Programa hori 2009an sortu zen, eta gaur egun 158 harreman daude aktibo.

“Beti behar dira harrera-familiak”, nabarmendu du Peñak. “Gipuzkoaren aurpegirik onena erakustera” animatu ditu herritarrak, “olatua” interesatuta egon litezkeen familia guztiengana irits dadin, eta behar diren 60 familiak lor daitezen. 

Profesionalen laguntzarekin

Gogorarazi du, halaber, familia guztiek jasotzen dutela beharrezko laguntza eta babesa: “Profesional talde bat daukate, harreraren jarraipena egiten duena, eta profesional horiek beharrezko erabakiak hartzen dituzte familiaren eta adingabearen ongizatea zaintzeko. Horrez gain, familiek laguntza ekonomiko bat jasotzen dute ohiko gastu guztiak estaltzeko, baita kasuan-kasuan aztertzen diren laguntza bereziak ere”.

 Peñak eskerrak eman nahi izan dizkie harrera-familiei eta arlo horretan lan egiten duten Beroa, Lauka, Agintzari eta Baketik elkarteei. “Familiek kontatzen digute egunerokoa maiz zailtzen dela eta erronka handiei egin behar izaten dietela aurre, baina aldi berean esperientzia ona eta oso positiboa dela”.

Harremanetarako

Programari buruzko informazio gehiago jaso nahi izanez gero jarri harremanetan: gipuzkoa.eus , familiaharrera@gipuzkoa.eus edo 943 112522.