Txatxilipurdi elkartean urteak daramatzagu Udalekuak antolatzen. Gozamenean oinarritzen dugu gure proiektu hezitzailea; hau da, haur eta gazteek egun magikoak bizitzen badituzte, gure proiektu  “hezitzailea”  lantzeko  testuingurua izango dugu. Hezitzaile eta gaztetxoen artean sortzen den giroak ahalbidetuko du gainerakoa eta denon artean, bizipenetatik, asko ikasiko dugu.

Garbi dugu harremanetan dagoela Udalekuen “magia”,  parte hartzaileen artean sortzen duten tribu txiki horretan.

Dena den, Udalekuen kokalekuak ere lagundu dezake honetan. 2017. urtean 12-14 urte bitarteko gaztetxoentzat  Udalekuak bigune nagusitan garatu ditugu. GaraiOn sorgingunea eta Zingira kanpina.  Azken honetaz hitz egin nahi dizuegu gaurkoan. Kanpinaren atzean dagoen egitasmoaz bereziki. Zingira Hezkuntza proiektuaz.

Egin dezagun atzera bost urte, nola eta zertarako sortu zenuten Zingira  Eskola proiektua?

 

Bailarako hainbat familiaren egitasmoa izan zen. Adin oso desberdineko haurrak genituen, baina denok ikusten genuen zein baliabide garrantzitsua zen gure haurrentzat jolas librea. JOLASAk berak, haur bakoitzak une horretan dituen erronkak azalerazten eta lantzen dituela ikusten genuen. Eta lan hori dela haur bakoitzak momentu horretan egiteko duen lanik garrantzitsuena: bere erronka pertsonalari heltzea, motibatzen duten gauzak egitea. Izan bizikletan ibiltzen ikastea, izan sugandilak harrapatzen ikastea, izan idazten ikastea…Gure haurrek barne motibazio horretatik ikastea nahi genuen, eta hori eman zedin sortu genuen Zingira. Baina ez 3-6 urte bitartean bakarrik, norbere motibazioak eta interesak beti dira ikasteko iturri nagusia, bizitza guztian.

Askotan helduoi iruditzen zaigu guk haurrei erakusteko ditugunak, haiek beren kabuz egiten dituztenak baino garrantzitsuagoak direla, eta beren jolasa bigarren maila batean uzten dugu. Guk ikaste-prozesuaren erdigunean jarri nahi genuen jolas librea.

Bestetik, haurrak haien jolasean zentratu ahal izateko, argi ikusten genuen lasai eta emozionalki SEGURU sentitu behar direla: ezin dira sentitu epaituak, ez mehatxatuak, ez manipulatuak. Garrantzitsua ikusten genuen kideen arteko elkarbizitza ahalik eta lasaiena egotea, eta gatazkak hazteko aukera bezala hartzea.  Segurtasunak elkarbizitzaren bi planoak kontuan hartu behar zituen: haur-haur eta heldu-haur harremanak kontuan hartzea alegia, eta horretarako beharrezko muga eta arauak jartzea, pertsona guztien lasaitasunerako. Eta hor funtsezkoa da helduon jarrera eta komunikazioa zaintzea: benetan presente egotea eta gure bortizkeria-mota guztiei arreta jartzea.

Gure proiektuaren hirugarren hanka NATURA zen. Haurren garapena naturan nahi genuen, hor azaltzen baitira haurren interes asko eta asko: xomorroak, zuhaitzak, ura, lurra, lokatza, sua eta abar, eta horretarako espazio pribilegiatua aukeratu genuen: Pagoeta.

Eta Zingiraren laugarren hanka: EUSKARA. Askatasunaz hitz egiten dugunean, asko zaintzen dugu haur handienak ez dezan zapaldu ahulena, txikiena. Baina badira bortizkeria batzuk ikusteko zailagoak direnak, sotilagoak. Adibidez, gure herrian gaztelania eta euskararen artean ematen direnak. Batzuetan iruditzen zaigu askatasuna dela bakoitzari berez ateratzen zaigun hizkuntzan hitz egitea, hor egon daitezkeen bortizkeria sotil horiei erreparatu gabe. Zingiran argi genuen ez genuela nahi hizkuntza handienak txikia zapaltzea, eta euskaraz libre bizi nahi duen gunea izan nahi du.

Lau oinarri horiek nahi genituen gure haurrak modu osasuntsuan haz zitezen, eta horiek bermatzeko sortu genuen Zingira hezkuntza proiektua.

Nola sortu genuen? Bada helduon motibazio handia aprobetxatuta, gure denbora eta gure energia guztia horretan jarrita. Horrelako hezkuntza-modeloetan guk baino esperientzia handiagoa zutenekin harremanetan izan ginen, haiengandik ikasteko eta espazioak ikusteko. Gure baliabide ekonomiko eskasak direla eta, Zingira sortzen familion dirua izan zen diru-iturri bakarra, baina beste hezkuntza-zentroetan ate joka aritu ginen, behar ez zutena gurera moldatu eta aprobetxatzeko. Gure esker ona adierazi nahi diegu haiei guztiei, hori gabe, nekez sortuko baitzen Zingira. Orain, baldintza ekonomiko hobeak izateko helburuarekin hartu dugu gure gain Zingira kanpinaren kudeaketa. Hortaz, erronka berriak ditugu aurrean!