Irunberriko arroilaren bide berdeak 6,38 kilometroko ibilbidea du, Irunberritik Ledeara. Kareharrizko horma bertikal-bertikalek osatutako sakanak ditu, ibai baten xuxurlak, eta tren baten triki-traka itzaliaren oihartzuna. Irati trena izan zen, bidaiarientzako lehen tren elektrikoa, Espainiar estatuan.

Baliabide natural aldetik izugarrizko parajea da Irunberriko arroila. Sai saldoa ere erraz ikus daiteke inguru horietan.

Ibilbide zirkularreko senda da Irunberriko arroilakoa. Harrera gunean du hasiera eta gora egiten du lehenengo eta behin. Ikuspegi zoragarria dago bertatik eta ia osorik ikus daiteke Leire mendilerroa. Ingurua Erreserba Natural moduan izendatuta dago 1987tik.

Desagertutako trenaren bidea jarraituta gaur egun erorita dagoen Deabruaren zubira iritsiko gara eta bertan ibilbideko lehen tuneletik igaroko gara. Modu horretan sartzen gara arroilara eta ikusgarria da benetan gorri, gris eta zuri koloreko harri labarren eta landareriaren berde argiaren arteko kontrastea.

Arroilaren bukaera aldera beste tunel bat aurkituko dugu berriz ere harrera gunera eramango gaituena.

Interpretazio zentro bat dute Irunberriko plaza nagusian.

Argazkien iturria: Irunberriko Udala.

Informazio gehiago hemen.