Nork bere ahotsa du eta ahotsari esker adierazten dugu nor garen, gure pentsamenduak, gure iritzia… Bizitzan zehar hainbat aldaketa ematen dira gure ahotsean, baina aldaketa nabarmenena nerabezaroan izaten da. Zergatik eta zerk eragindako aldaketa da? Eureka zientzia museoko dibulgatzaile Larraitz Etxeberriak azalpen oso interesgarriak eman ditu Radio Euskadiko La mecanica del caracol saioan.

“Adinarekin lotutako aldaketa fisikoek garrantzi handia dute ahotsaren aldaketan. Haur oso txikietan ahots gehienak oso antzerakoak dira nesken eta mutilen artean, baina nerabezaroan hori aldatu egiten da; izan ere, aldaketa anatomiko garrantzitsuak ematen dira garai horretan”, azaltzen du Etxeberriak.

Adituak azaltzen du laringean ematen den lehen aldaketa anatomiko garrantzitsua nerabezaroan ematen dela. “Hazkuntzarekin lotutako aldaketa da, eta bai nesketan bai mutiletan ahotsa baxuagoa bihurtzen da. Arrazoia oso xinplea da: laringea tamainaz handitzen da. Gero eta ahots-korda luzeagoak gero eta bibrazio baxuagoak”.

Nerabezaroan, ordea, alde nabarmenak egoten dira nesken eta mutilen arteko ahotsetan. Hormonak daude honen atzean. “Batez ere mutiletan ematen den testosterona mailaren hazkundeari lotuta dago kontu hau. Testosteronak loditu egiten du laringea. Gero eta lodiagoa gero eta ahots baxuagoa edo sendoagoa”.

Hala, aldaketetako bat hazierarekin dago lotuta eta bestea mutil nerabeetan ematen den aldaketa hormonalarekin. “Batzuetan laringearen loditzea hain da handia zintzur-sagarra ere agertzen dela”, dio Etxeberriak.

“Beste aldaketa bat ere ematen da nerabezaroan, eta da ahots-korden ehunaren diferentziazioa. Era bereko ehuna izatetik hiru ehun mota agertzen joaten dira, eta bakoitzak bere funtzioa betetzen du. Muskulu-ehuna dago alde batetik, kolageno-ehuna agertzen da bestetik, eta azkenik muki-mintza dago. Lehena sistema guztia modulatzeko da, bigarrena elastinaz inguratuta egonik elastikotasuna ziurtatzeko da, eta hirugarrenak ahots-kordak babesten ditu. Hiru kapa horien konbinazioaren arabera finkatzen dira ahots bakoitzaren ezaugarriak”.

Pubertaroko aldaketaren ostean 30-50 urtean mantentzen dugu ahots berdina gizakiok. Urteekin ahotsarekin lotura duten organoak indarra galtzen joaten dira, eta ahotsa aldatzen joaten da poliki-poliki.

Argazkia: Luz Fuertes.