Mariasun Landak idatzi eta Jon Zabaletak ilustratutako Txan fantasma liburuaren app-a da. Galtzagorri elkarteak sortu zuen orain urte batzuk. Bereziki, 8-12 urte bitarteko neska-mutilei zuzenduta dago, baina familian jolasteko modukoa da.

“Multiplataforma erako aplikazioetan egin daitezkeen proposamenik berritzaileenak eta duinenak eman dizkiogu app honi, jatorrizko testuaren eta irudien garrantzia indartuz: paperaren bi dimentsioetatik pantailaren hiru dimentsioetara egin dugu jauzi; maskota birtual bat, kantuak, puzzleak, jolas herrikoiak (esku-jolasak, gordeketan…), ipuineko pasarteekin lotutako asmakizunak, ohiko jolas digitalen egokitzapenak, sormena eta ahozkotasuna lantzeko jolasak eta abar aurki daitezke app honetan”, azaldu dute Galtzagorritik.

Android eta iOS sistemetarako (iphone/ipad) bertsioan dohainik eskura daiteke app-a bakoitzari dagokion saltoki birtualean, baina erabili ahal izateko ezinbestekoa izango da paperezko liburua esku artean izatea, alegia, papera eta jatorrizko obra teknologia berrien munduan murgiltzeko giltza izango dira.

Zaindu zure Txanmagotxia; atera Txan labirintotik; adi autotxokeetan; jolastu gordeketan; asmatu liburuari beste amaiera bat; grabatu kontakizuna zure ahotsean eta partekatu lagunekin; sartu ispiluen gelara… askotariko proposamenak ditu, eta euskaraz.

App-a erabiltzeko gida hemen.