Orain urtebete ipini zuten martxan egitasmoa Elgetan; hogei bat saio egin dituzte honezkero.

P_20140919_173907

Mila biztanleko herria da Elgeta, eta liburutegiko arduradun Geaxi Ezpeletaren ekimenez hilean pare bat ipuin kontalari saio egiten dituzte hiru urtetik gorako neska-mutikoendako. Egitasmoaren berezitasuna da ipuin kontalari boluntarioekin egiten dituztela saio horiek.

Kontalari boluntarioekin taldetxoa egin duzue?
Bai. Helburua zen herriko txikiei aisialdi aukera ezberdin bat eskaintzea, eta kontuan edukita liburutegiaren aurrekontua ez dala nahikoa profesionalen ipuin kontaketa kopuru dezente bat eskaintzeko ideia hau garatu nuen. Polita iruditu zitzaidan eta aberasgarria izan zitekeela pentsatzen nuen. Tanteatu nituen pare bat lagun, posible ikusten zuten eta parte hartzeko prest agertu ziren. Bilera bat deitu genuen. Bospasei pertsona elkartu ginen, eta iazko otsailean egin genuen lehenengo saioa.

Zein da kontalarien perfila? Gurasoak dira, hezitzaileak dira…?
Herriko jendea da. Apur bat denetik dago. Gurasoak daude, irakasleak… gazteak orokorrean.

Zein maiztasunekin egiten dituzue kontalari saioak?
Pare bat bilera egiten ditugu urtean, eta egutegi baten arabera zehazten dugu. Gutxi gorabehera hilean pare bat egiten ditugu. Boluntarioen disponibilitatearen eta gogoaren arabera izaten da.

Haurrek zelan hartu dute ekimena?
Egia esan erantzuna oso positiboa izan da. Planteatu nuenean ez nuen horrelako erantzuna espero ez boluntarioen aldetik ez eta haurren gurasoen aldetik. Entzule kopuru oso polita edukitzen dugu eta umeak oso formal egoten dira. Gustura etortzen dira.

Ipuinen kultura sustatzen duzue, gainera, modu horretan.
Bai, euskarazko ahozkotasuna. Saio irekiak izaten dira. Berezitasuna da haurrak bakarrik sartzen direla, gurasorik gabe. Ordu erdiko saioak izaten dira, batzuetan eskulanekin tartekatuta… boluntarioen arabera. Nahiko librea izaten da. Hiru urtetik gorakoendako da, beraz laburtxoak izaten dira. Ipuinak hiruzpalau izaten dira normalean, saioko.