Carlos Magro adituak defendatzen du azterketak ez direla ikasitakoa ebaluatzeko modu bakarra.
Eskola modernoaren Freinet teknikak izeneko liburuan Celestin Freinet pedagogo frantsesak zioen: “Ez dugu sekula umeek porrot egin dezaten utzi behar; ezinbestekoa da arrakasta izan dezaten nahiz eta horretarako irakaslearen parte hartze eskuzabala beharrezkoa izan. Egindako lanarekin harro sentiarazi behar ditugu”.
Eskola modernoa, hezkuntza sistemaren aldaketa… asko dira aldaketa beharrezkotzat jotzen duten hezkuntza alorreko ikerlariak eta profesionalak. Carlos Magrok egindako gogoeta dakargu honakoan. Dio aldaketaren gakoa indarrean dagoen ebaluazio sistema aldatzean datzala. Proposatzen du ebaluazio sistema ezbaian jartzea, ebaluazioen helburuak aldatzea, ebaluazio formazioa bultzatzea, eta ebaluazio sistema berriak esperimentatzea. “Ikastea ebaluazioak gainditzearekin nahastu dugu”, adierazi du. Eta dio azterketak edo ebaluazioak ez direla ikasitakoa ebaluatzeko modu bakarra. “Ikasle batek zelan ikasten duen zerikusi handia du irakasleak galdetzeko duen moduarekin, zerikusia du azken finean espero dugun ebaluazioa sistemarekin (…) Azterketa bat gainditzeko ikasteak zerikusi gutxi dauka ikastea hutsagatik ikastearekin (…) Azterketak gainditzea, tituluak eskuratzea… ez luke inoiz helburua izan behar. Eta ez gainditzea ez da porrotaren adierazgarri. Freinet-ek dioen moduan ez genuke umeek porrot egitea onartu beharko”.
Ikasketa sakona bultzatu
Ikasketa sakona deritzona bultzatzearen aldekoa da Magro: “Hobeto garatzen ditu pentsamendu kritikoa, komunikazioa, kolaborazioa, arazoen kudeaketa… azken finean XXI. mendean beharrezkoak diren goi mailako konpetentziak”, dio adituak. “Mundua ez da irakurtzen ikasi behar dugun liburu bat”.
Eta Magrok dio nork bere ikastetxetik bultzatu behar duela aldaketa: “Badirudi zabaltzen ari dela aldaketa hezkuntza zentroetatik etorriko dela —behetik gora eta ez goitik behera—.
Argakiaren iturria eta gaiaren inguruko informazioa gehiago hemen.