Aisialdi eredu berri bat proposatzeko bost liburuxka plazaratu dituzte Herri hezitzailea, eskola herritarra lantaldea osatzen duten eragileek. Aisialdi parte hartzailea, euskalduna, hezitzailea eta herritarra garatzen dihardute denek, eta horretan eragin nahi dute, hutsunea sumatu baitute.

image

Parte hartze prozesuak bai, baina herri ugaritan haur eta nerabeen ikuspuntua kontuan hartzen ez dela jabetuta hartu dute proiektuari ekiteko lema, Txatxilipurdi elkarteko kide Maialen Gorosabelek adierazi duenez.

Haur eta gazteen parte hartzea bultzatzeko haritik tiraka osatu dituzte liburuxkak, honako gaien bueltan: nola sustatu haurren parte hartzea ikuspegi feministatik, nola egin udaleku parte hartzaileak, nola egin ludoteka parte hartzailea eta parkeak bizitzeko modu berriak; Lorea Agirrek taxutu du horietako bat. Ez dute hartzaile mugaturik zehaztu: familientzat, gurasoentzat, aiton-amonentzat… Herrira zabaldu nahi dituztela nabarmendu du Gorosabelek. “Herritarrak premiazko eragile hezitzaileak dira umeen heziketarako”. Hilaren 24an eta 25ean Donostian egingo dituzten jardunaldietan kaleratuko dituzte liburuxkak; aurki, gainera, ohiko saltokietan eskuratu ahalko dira.

Poza oinarri, heztea helburu

Haurren kulturaren aitortza nahitaezkotzat jo du Topaguneko kide Sonia Perezek: “Pertsona moduan ulertzen ditugu haurrak. Sentitu eta pentsatzen duten heinean, erabakitzeko gaitasuna ere badaukatela uste dugu”. Erabakitzeko benetako ahalmena eman nahi dietela azaldu du. “Ez da aski zer nahi duten entzutearekin; haien proposamenei erantzun bat ematen ahalegindu behar gara”. Bizipozean oinarritutako aisialdi hezitzaile baten alde ere egin du lantaldeak. “Pozean oinarrituta, baina heztea helburu duena. Euskaraz eta euskaratik sortua, noski”.

Aniztasunean, berdin eta parekide. Auzolanean garatutako egitasmoa “guztientzako aukera” dela ziurtatu du Perezek. Lantaldeak, halaber, ingurune natural eta kulturalaren zaintza babesten du. Orotara, zazpi printzipio mamitu dituzte. “Elkarren osagarri dira denak. Edozein bazter lagatzea, bidean galtzea ekarriko luke”, ohartarazi du Perezek.

Orotariko eragileak, batuta

Aisialdia, hezkuntza, euskalgintza, administrazio publikoa… Esparru anitzetako eragileak biltzen ditu lantaldeak. Aniztasun horrek, justuki, egitasmoa “aberasten” duela uste du Topaguneko eledunak: “Asko gara, eta ezberdinak. Elkar elikatzeko aukera ematen digu horrek”. Proiektuak Andoainen (Gipuzkoa) du jatorria. Perezek azpimarratu du, ordea, Euskal Herrira hedatzea erdietsi dutela. “Ametsetatik errealitaterako jauzia egin dugu”.

Izan ere, zortzi herritan dagoeneko martxan jarri dituzte herri proiektu hezitzaileak: Gipuzkoan, Donostiako Egia auzoan, Arrasaten eta Soraluzen; Araban, Agurainen; Bizkaian, Otxandion eta Diman; Nafarroan, Baztango eskualdean; eta Nafarroa Beherean, Baigorrin. Perezen hitzetan, taldearen izaerari eustea izan da giltzarria, lantaldeak tokian tokiko egitasmoen autonomian sinesten baitu. “Gure asmoa ez da dagoena ordezkatzea; ez dagoen tokian sortzea baizik, beti ere osagarritasunean oinarrituta”, argitu du.

Hona hemen, gaur-gaurkoz taldea osatzen duten eragileak: Irrien Lagunak Kluba, Hik Hasi pedagogia egitasmoa, Euskaltzaleen Topagunea, Ikastolen Elkarteko Aisiola aisialdi taldea, Huhezi fakultateko Sorguneak ikertegia, Amarauna sarea, Tabakalerako Hezkuntza saila, Arrasateko Txatxilipurdi euskara eta aisialdi elkartea, Soraluzeko Pil-pilean euskara elkartea, Lasarte-Oriako Ttakun kultur elkartea, Oarsoaldeko Garapen Agentzia, Lizarrako eta Iruñeko udal haur eskolen taldea, eta Bilboko Urtxintxa eskola.

Albistearen eta argazkiaren iturria hemen.