Gatazken kudeaketa lantzeko oso egokia da Snack Attack film laburra. 2012koa da eta Andres Cadelago da zuzendaria. Bost bat minutuko iraupena du.

Bertan adineko emakume baten eta gazte baten arteko istorioa jasotzen da. Emakumeak pentsatzen du gazte bere gailetak jaten ari dela, baina sorpresa ederra hartuko du istorioaren amaieran.

Gaizki ulertuek eta aurre-iritziek askotariko gatazkak sortzen dituzte, eta bistan da garrantzitsua dela horien aurrean nola jokatzen dugun. Istorio honetan jokabide oso desberdinak dituzte adineko emakumeak eta gazteak.

Film labur honetatik abiatuta luzatu daiteke hausnarketarako aukera. Zer gertatzen da istorio honetan? Zein da arazoa? Zertaz konturatzen da emakumea? Zuk zer egingo zenukeen emakumea bazina? Eta mutila bazina?

Halako galderak eginda gatazken kudeaketaren inguruko gogoeta interesgarria bideratu daiteke.