Etxean egon gara hainbat astetan zehar, eta egoera berrietara egokitu behar izan gara. Hala egin behar izan dute ere ipuin kontalariek. Izan ere, egoerak bultzatuta, ipuin kontalaritza saio telematikoak egin dituzte aste hauetan. 

Arrasaten, adibidez, Debagoieneko bost ipuin kontalari dabiltza OstegunERO saio telematikoan. Kolaborazio berezi bati esker, zeinu hizkuntzan ere ikusten da ipuinetako bat. Dorleta Kortazarrek, Lander Juaristik eta Vanessa Gonzalezek kontatzen dituzte haurrentzako ipuinak, eta nagusientzako gomendatutakoa, aldiz, Virginia Imazek eta Maider Alcelayk. 

Bestalde, Maite Franko kontalari irundarra ere ipuin kontaketa telematikoak egiten ibili da aste hauetan. Haren bizipenak bildu ditugu hurrengo elkarrizketan.

Maite Franko ipuin kontalaria.

Nolakoa izan da saio telematikoetara moldaketa? 

Nire kasuan oso zaila izan da. Ni ez naiz oso ona teknologiekin eta asko kostatu zait egoerara moldatzea. Bideoekin hasteko jakintza batzuk izan behar dira eta hasieran etsipena sentitu nuen. Baina gero erritmoa hartzen hasi nintzen eta orain nahiko ondo moldatzen naiz.

Inoiz pentsatu duzu horrela egingo zenituenik ipuin kontalaritza saioak?

Inoiz ez. Egia da beti presentzialki egitea gustatu zaidala, baina moldatu naiz. Ekoizpen aldetik ez da oso zaila, nire bideoak gainera ez dira oso oso landuak,eta egia esan ez zait gehiegi lantzerik gustatzen, naturalagoa baita. Gainera, nik ez dakit editatzen, papeekin adibidez, arazoak izan ditut. Izan ere, telefonoan alderantziz grabatzen dira paperean idatzitako hitzak… Horrelako hainbat arazo izan ditut. Kalitate aldetik nire bideoak mugatuak izan dira sarri, baina mezua haurrei helarazteko nahiko izan da.

Formakuntza aldetik ere justu ibili naiz.  Eta ezin laguntza eskatu, jendea etxean egon delako konfinatuta. Baina azken finean, haurrak zein nagusiak poztea eta entretenitzea izan da helburua, eta nire ustez, kontalariok lortu dugu.

Kontalarion artean hizketan,,ekoizpenarekin berarekin moldatzen ez direla komentatu didate eta kamara aurreko grabaketak zailak egin zaizkie. Niri ez zait zaila egin kamara aurreko lana baina Wetransfer moduko gauzak existitzen zirela ere ez nekien. Baina beno, ikasketa prozesu handi eta interesgarria izan da.

Umeek nola erantzuten dute formatu berrira?

Konfinamenduan haurrek asko gozatu dute eta eskertuta azaldu dira. Hasieran oso gaizki geunden denok etxean eta sentimendu txarrak saihesteko modu bat zen. Espero dut zenbait etxetan nire ipuinekin lagundu izana.

Egia da, presentzialki ez izaterakoan, iraupenari buelta bat eman behar izan diodala.

Izan ere, nik 45-50 minutu bitarteko ipuin kontaketak egiten ditut. Baina egia da internet bidez egiteko zatikatu egin behar direla bideoak, kontuz ibili asko pisatzen dutelako… 

Eskaera handia dago momentu honetan?

Momentu honetan dena nahiko zoro dago. Hala ere zenbait liburutegi, udal… mugitzen hasiak dira. Uda ez dela guretzako denboraldirik onena eta kalera irten ahal garenez ea zelan doan dena. Momentuz presentzialki ipuin kontaketarik egitea ez da aurreikusten. Ikusiko dugu zelan doan dena, baina ni itxaropentsu nago.

Maite Frankoren webgunea hemen.

Arrasateko ipuin kontaketak jarraitzeko klikatu helbide hau: www.arrasate.eus/biblioteka