Arrasateko Txatxilipurdi elkarteak kaleratu du 41 jolas dituen liburuxka; hamar eurotan dago salgai.
Kalekantoi izeneko kaleko jolasen bilduma kaleratu berri du Txatxilipurdi elkarteak. 41 jolas ditu liburuxkak, eta, astelehenean aurkeztu zuten Arrasaten. Azaldu zutenez egunerokotasuneko hainbat egoeratan jolasteko jolasak batzen ditu, sei multzotan sailkatuta: Bidejolasean, Gora jaixak, Helduak poteoan ari dira, Eta orain bazkaria, Bizi bete kalea eta Amalurra gure lagun.
Egileak arrasatearrak dira: Maddi Urizarrek sortu ditu jolasak askotariko jatorrietan oinarrituta eta Andoni Iñurritegirenak dira ilustrazioak eta diseinua. Bilduma salgai dago Txatxilipurdiko egoitzan, Arrasaten, hamar eurotan.
Lau urtetik gorako haurrendako da Kalekantoi, eta umeen ikuspegitik sortu da: “Herri eta hiriak haurrenak ere badirela aldarrikatzeko sortu dugu. Horregatik bultzatu nahi izan ditugu haurrak kalea bere egitera eta euren kabuz bertan jolastera. Jolasaren indar sozializatzailea eta hezitzailea azpimarratu eta jarduera ludiko eta talde jolasaren bidez zenbait gaitasun lantzeko baliagarria den tresna sortu dugu”.
Helduen esku hartzea
Haurrendako izan arren helduen esku hartzea ere bultzatu nahi dute Txatxilipurdikoek: “Horregatik irizpide eta aholku sorta ere prestatu dugu, batez ere, erabilera hezkidetzagilea sustatu guran. Hezkidetza zergatik? Horren ohikoak diren sailkapen sexistak ekidin eta neska zein mutil izan jolasteko aukera guztiak eskainiz, haurren euren identitate eta gaitasun sozialak askatasunean eraikitzeko”, adierazi dute.