Irati Bikuña, Lehen Hezkuntzako irakaslea da eta aurten estreinatutako “Lit, ikaskuntza erraztea eta berrikuntza” masterra ikasten ari da Mondragon Unibertsitatean. Masterrak metodologia hibridoa erabiltzen du; hau da, ikasketa online zein presentzialak nahasten ditu. Egungo egoerak hibridotasuna eskatuko duela defendatzen dute askok, eta dagoeneko pandemia baino lehen metodologia online zein presentziala tarteka erabiltzen duen masterra ezagutu nahi izan dugu, ikasle baten eskutik.

Zein da masterra eta zein helburu ditu?

Lit, Ikaskuntza Errazten eta Berrikuntzan Unibertsitate Master bat da, 90 ECTSkoa. Bere helburu nagusia hezkuntza- eta lan- testuinguruetako ikaskuntza-prozesuetan diharduten profesionalei laguntzea da, bai lanbideari buruzko gogoeta kritikoa egiten laguntzea, bai hainbat arazo eta erronkari, bai gizartea ikaskuntza-inguruneei eskatzen ari zaien aukerei aurre egiteko estrategia praktikoak eta lanabesak eskuratzen laguntzea. 

Programa elkarlanaren eta esperientziaren bidezko ikaskuntza lehenesten duen ikuspegi batean oinarritzen da, eta praktikari buruzko gogoeta bateratu bat eragitea du helburu, ikaskuntzak ikerkuntza-proiektuetan berehala aplikatzea bultzatuz. Hori dela eta, programak garrantzi handia ematen dio ikerkuntzari; areago, ikerketari heltzeko modu berri bat proposatzen du, ikaskuntza kooperatibo, sozial eta taldekakoaren testuinguruan.

Hibridotasuna du oinarritzat masterrak, zer da zehazki?

Masterra online da gehiena baina zati presentzialak be badaude: inspirazio bidaiak, workshopak, adituen bisitak… Masterra ziklotan antolatuta dago, eta orain adibidez,  hirugarren zikloan, LEGO ereduan gaude, hau da, bakoitzak modulu ezberdinak aukeratzen ditu bere ibilbidea jarraitzeko eta osatzeko, master amaierako proiektura begira. Masterra TEAMLABS laborategiaren eta Mondragon Unibertsitatearen arteko elkarlana da.

LEGO ereduari dagokionez, irailetik gabonetara ispirazio bidaiak eta modulo zehatzak izan ditugu, abiapuntu gisa. Eta bigarren zikloan 13 modulo izan ditugu aukeran eta bakoitzak 6 modulo aukeratu behar ditu, bere arlorrerako hobe datorkionak edo bideratuta daudenak. Espezializazio modu bat da. Moduloak ere online zein presentzialki izaten dira.

Irailetik aurrera, hibridotasunak presentzia handia izango duela dirudi… Masterra eredu egingarritzat ikusten duzu?

Hibridotasuna erantzuna izango dela dirudi. Irailean hasi zen master hau, baina pandemia garaian lasai asko eutsi dio egoerari. Egoera zail honetan metodologia hau egingarria da guztiz eta beste hainbat gradu, adin zein taldera egokitu daitekeela uste dut. Nahiz eta bakoitzak bere ibilbidea aukeratu, taldean lan egiten dugu askotan, moduluetan 5-15 ikasle gaude. Ikasle talde tamaina aldetik, hibridotasun aldetik zein metodologia aldetik egoera berezi honetan eredu izan daitekeela uste dut.

Informazio gehiago masterraren webgunean dago eskuragarri.