Plastiko birziklatuarekin egindako bigarren parkea irekiko dute Zarautzen

Jolas-parkeak egiten ditutzten enpresa asko daude, baina besteengandik bereizteko hausnarketa abiatu zuten Zarauzko Jolas enpresako kideek. Hala, gizartean indarrean dauden balioei jarraiki, klima aldaketaren aurkako olatura igo, eta parkeak birziklatutako plastikoarekin egitea erabaki zuten.

Ekainaren 25ean ireki zuten lehenengo haur parkea, Zarautzen bertan, eta abuztuko lehenengo  astean zabalduko dute bigarrena. Halere, aurretik ere Kilometroak jaian ere haien aletxoa jarri zuten Jolaseko kideek: kanpo-eremua egokitu eta “haurren basoa” sortu zuten. Iñigo Isasti arlo komertzialeko zuzendariak azaldu duenez, hormigoizko eskailerak eraldatu zituzten eta plastiko birziklatuarekin arrapalak eta txirristak jarri. Gainera, haurrentzako jolas-parkeez gain, helduentzako ariketa fisikoa egiteko eremuak eta hiri altzariak ere egiten dituzte.

Materialak, abantaila ugari

Adierazi bezala, parkeak egiteko erabiltzen duten materiala, plastiko birziklatua da, baina era berean, birziklagarria ere bada; izan ere, behin eta berriz birziklatu edo berrerabili daitekeela azaldu du Isastik: “Edukiontzi horitik ateratzen den produktua erabiltzen dugu, eta ondoren, amaierara iristean, berriz birzikla daiteke. Bizitza asko ditu material honek”. Zehatz esanda, zur plastikoa da erabiltzen dutena.

Modu horretan, ekonomia zirkularrari ere positiboki eragiten diola azaldu du Isastik eta lehengaien erabileraren murrizketa erabatekoa dela. “Zuraren erabilera saihestuta, basoetan zuhaitz gehiago egongo dira, eta hormigoia ekidinda, ez direla harrobiak horrenbeste ustiatuko”, azaldu du. Horri lotuta, plastiko birziklatuzko profilak  iraupen aldetik altzairuak edota hormigoiak baino gehiago irauten duela gehitu du, eta mantenurik gabe 20 eta 25 urte artean iraun dezaketela parkeek.

Dena den, Isastirentzat abantaila nagusiena da herritarrentzat kontzientzia hartzeko modukoa dela prozesua, batez ere, haurrentzat: “Egunero-egunero etxean egiten duten sailkapenak zerbaiterako balio duela ikusiko dute. Edukiontzi horira botatzen dutenarekin parkeak egin daitezkeela ikasiko dute, eta hori gizartearentzako onura da”.  

Bestetik, Jolasen parkeek segurtasun araudia betetzen dute; haurren segurtasunerako berme guztiak betetzen dituztela dioen ziurtagiria dute.

Naturara gerturatzeko joera

Iñigo Isastiren arabera, azken urteetan naturarekin “harremana estutzeko” joera ari da gailentzen; adibidez, ikastetxeetako jolastokietan sumatzen du hori.  “Lehen parkeetako jokoak metalezkoak izaten ziren eta herdoildu egiten ziren. Ondoren, egurrezkoak izaten ziren, baina ezpalak ateratzen ziren edo usteldu egiten ziren. Orain korronte berria dago”, esan du Isastik.

Zur plastikoaren erabilerak “birziklatzen jarraitzeko indarra” ematen duela gaineratu du, eta plastiko hondakinak egoki kudeatuta, itsasora, zabortegietara edo erraustegietara bideratzea ekidingo dela.