Urtxintxa hezkuntza ez-formalean kokatzen den aisialdi elkartea da, eta Ainhoa Epaltza heziketa aktiboko lantaldeko arduraduna. Bestetik, urtean zehar bestelako egitasmo batzuekin aritzen da, eta udan, udalekuen ardura hartu zuen.

Nola joan dira Urtxintxaren udalekuak?

Laburtzearren, udalekuak gorabeheratsuak izan direla esango nuke. Dena den, argi geneukan haurrengatik aurrera egingo genuela, eta udalekuen aldeko apustua egin genuen. Esan bezala, ibilbidea gorabeheratsua izan den arren, ume horiei behar zuten arnasa eman diegu. Beste arlo askotan bezala, azken momentuko protokoloak, neurriak eta erabakiak hartu behar izan ditugu, eta egoerak berekin zekarren ziurgabetasunarekin eta ezjakintasunarekin egin dugu lan batzuetan. Neurri zorrotzak hartu ditugu, baina gure balorazioa oso positiboa izan da.

Haurrak eta familiak  ere pozik geratu dira?

Hezitzaileak ardura osoz aritu dira lanean, eta 500 haurrek eta haien familiek segurtasunez gozatu dute aisialdiaz. Hori zen hain zuzen ere gure helburua: aisialdian, euskaraz eta lagun artean gozatzea; batez ere pasatu duten guztia eta gero. Bestetik, azpimarratu nahi dut komunitatearen laguntzarik gabe ezinezkoa izango zela egin dena: denon artean lortu dugu udalekuekin aurrera egitea, eta haurrek erakutsi duten jarrera benetan nabarmentzekoa izan da

Dinamikak aldatu behar izan dituzue…

Noski. Etorri zaizkigun neurri eta protokoloak kontuan hartuta, gauza asko moldatu egin behar izan ditugu. Halere, hein handi batean, aberasgarria izatera ere iritsi da: harrituta geratu gara haurren erantzunarekin! Pandemian jarri dizkieten muga guztien gainetik, egoerari aurre egiteko ahalmena erakutsi dute; imajinazioz aritu dira eta jolasteko gaitasunarekin. Baina bai, orain hezkuntza formalean gertatu den bezala, guk ere –bi hilabete lehenago– neurriak martxan jarri behar izan genituen, eta gure egunerokoa eta antolaketa egoera berrira moldatu.

Ikasturte berriari begira, zein asmo duzue?

Beno, egia da egitasmo gutxi batzuk oraindik ezin ditugula abiatu, baina ilusioz gaude beste hamaika konturekin aurrera egiten ari garelako:  aisialdian eta hezkuntza ez-formalean ematen ditugun ikastaroekin, formazioekin eta esku-hartze guztiekin jarraituko dugu. Bestetik, tamalez, ezingo ditugu eskolekin egiten genituen pirata egonaldiak egin; oraindik ez, behintzat.

Zein da esku artean duzuen erronka handiena?

Esaldi batean erantzutea zaila da. Haurrak konfinamendu eta uda garaian kaltetuenak izan dira, eta gure erronka horri buelta ematea da; hain zuzen ere, gure esku dagoen guztia eskainiz.