Hiru diputazioek, Eusko Jaurlaritzak eta kirol federazioek elkarlanean prestatu dute protokoloa, eta bakarra izango da Euskal Autonomia Erkidego osoan. Araban eta Bizkaian saioak irailaren 28an hasiko dira, Gipuzkoan, berriz, urriaren 1ean.

Bizkaiko Euskara, Kultura eta Kirol diputatuak Lorea Bilbaok agerraldia egin du adierazteko abiatzear dela Eskola Kirola Bizkaian ere.

Hasiera batean entrenamendu saioak soilik egingo dituzte, lehiaketarik gabe eta segurtasun eta higiene neurri bereziekin. Kontaktu fisikoa murriztu egingo da, aldagelak ezingo dira erabili eta saioetan ez da publikorik egongo. Bestetik, kanpoko jarduerek lehentasuna izango dute, eta entrenamenduak talde itxietan eta plaza kopuru mugatuarekin egingo dira. Txanda batetik bestera, gainera, instalazioak desinfektatuko dituzte, materiala partekatuz gero higiene neurriak hartuko dira eta maskara jarduera fisikoa egiten den bitartean bakarrik kendu ahal izango dute parte-hartzaileek.

Lasaitasun mezua bidali die Bilbaok familiei. Eskola Kirola modu seguruenean egiteko baldintzak egongo direla adierazi du eta neska-mutikoen garapenerako jarduera honek duen garrantzia azpimarratu du.

Entitate parte-hartzaileek ere neurriak hartzeko exijituko zaie eta protokolo bat zehazteko. Hezitzaileek ikastaro berezi bat egin beharko dute eta gurasoei arauak betetzeko konpromisoa jasotzen duen agiri bat sinatzeko eskatuko zaie.

Araban ere irailaren 28an ekingo diote Eskola Kirola programari. Gipuzkoan, berriz, urriaren 1ean.

Argazkiaren iturria hemen.