Pandemiaren beharretara egokitu den ikasturte hasieran, aspalditik datorren eztabaida berpiztu da, inoiz baino oihartzun handiagoarekin: jardun jarraia, bai edo ez? Askotariko iritziak daude gaiaren inguruan, eta kontrara ere, badaude polemikan sartu nahi ez direnak ere.

Amelia Barquin irakaslearen iritziz, jardun jarraitua irakasleentzat eta “gizartean hobekien kokatuta” daudenentzat izan daiteke abantaila, baina ez familia guztientzat; adierazi du ez dela komunitatearentzat “onuragarria” eta komunitate-ehunaren arteko harremana “kaltetu” dezakeela: “Haur batzuk arratsaldean, eskolatik irtetean, kalera edo parkera joaten dira inertziaz gurasoekin eta lagunekin; jardun jarraiarekin ordea, ordu bietan iritsiko dira etxera bazkaltzeko, eta asko ez dira berriz aterako”. Bestetik, Barquinek hizpide izan ditu eskola-jantokiak, diskriminazioa, euskara eta baita sindikatuak ere, elDiario hedabidean argitaratutako artikuluan. Bertan hainbat galdera egiten ditu, hausnarketara bideratuta.

Dena den, esan bezala, hezkuntzako langile eta soziologiako aditu ugari ari dira haien iritziak plazaratzen. Cuaderno de campo blogean, Mariano Fernández-Enguitak zientzia ardatz hartu nahi izan du eta ikasleen errendimenduaz eta nekeaz aritu da; erritmo zirkadianoez, hain zuzen ere. Soziologoaren esanetan, jardun jarraiaren aldeko probei buruz “ez dago asko” esateko: “Gaur-gaurkoz, zerora murrizten dira. Gaia landu duten ikertzaile eta adituei erreparatzen badiegu, deigarria da oraindik inor alde ez egotea”.

Bide beretik jardun du Elena Sintesek, eta harago joan da ordutegiei dagokienez: ” Gure hezkuntza-sistemak planteamendu zurrun bati erantzuten dio. Ez dago arrazoirik ikastetxe bateko haur guztiak goizean ordu berean sartu behar izateko. Sistemak ordutegi malguak eskaini beharko lituzke, ikastetxe bakoitzaren gizarte-testuinguruaren eta hezkuntza-etapa bakoitzaren ezaugarri psikoebolutiboen arabera”.

Europari erreparatuta Alemania, Eslovakia eta Hungaria dira jardun jarraia soilik duten herrialdeak, eta beste zenbaitetan bi ereduak daude: Espainian, Italian, Austrian, Grezian, Zipren, Maltan eta Bulgarian, hain zuzen ere. Gainerako herrialdeetan, goizez eta arratsaldez jasotzen dituzte eskolak –tartean, bazkaltzeko unea dutelarik–.

Halere, hainbat guraso elkarte eta irakasle ari dira jardun jarraiaren alde, eta adierazten dutenez,  9: 00etatik 14: 00etara izan daitezke eskolak, eta jantoki zerbitzua jarri. Ondoren, uste dute haurrak 16: 00ak arte egoteko aukera jarri beharko litzakeela zentroetan,  eskolaz kanpoko jarduerak hasi arte. Dena den, diotenez, ikastetxeko zuzendaritzak zehaztu beharko luke ordutegia.

Hezkuntza Sailaren bilera Arabako ikastetxeekin

Gogoratu behar da, Nafarroako Gobernuak hartutako erabakiari jarraiki, Araban 40 ikastetxe mobilizatu zirela duela sei urte, eskoletako jardun jarraia eskatzeko. Azaldu zuten ereduak joan-etorriak erraztu eta ikastetxeetako sarrera-irteeretan pilaketak saihestuko lituzkeela eta jantokietako masifikazioa konponduko lukeela.

Pandemiarekin berriz azaleratu da gaia, Haur eta Lehen Hezkuntzako hainbat eskolek eskatu dute jardun jarraitua baimentzeko. Ostiralean, ordea, Blanca Guerrero Arabako Hezkuntza ordezkariak bilera egin zuen Arabako ikastetxe publikoetako zuzendariekin, eta Jaurlaritza ikastetxeetan lanaldi jarraitua ezartzearen aurka dagoela adierazi zien.

Halere, Gasteizen, hainbat eskolatan inkestak egiten ari zaizkie familiei pandemiak irauten duen bitartean jardun jarraitua nahi duten galdetzeko.