Game Erauntsia taldeko kidea da Garikoitz Larrañaga. Streamer euskaldunek Twitch plataforman euskaraz jarduteko eta elkartzeko tokitxo bat egin nahi dute. Eskaera jarri dute martxan, eta botoak lortzeko ahaleginean ari dira.

Twitchek erabiltzaile asko ditu? Zer da denek ulertzeko moduan azalduta?
Twitch Interneteko plataforma bat da zuzeneko bideo emisiok egiteko aukera ematen duena. Telebistan zuzeneko saioak emititzen dituzten moduan Twitch Interneteko arloa izango litzateke. Zentzu horretan oso-oso sartuta dago bideo-jokoen mundua, baina bestelako askotariko aukerak ere eskaintzen ditu. Bada jendea tutorialak ematen dituena, irakaskuntzarako saioak egiten dituena… Aukera pila ematen ditu plataformak, egia esan. Datu bat ematearren lau bat milioi erabiltzaile ditu hilabetero. Ikusle kopurua, berriz, hamazazpi milioi eta erdikoa da batez beste.

Twitch-en euskarazko edukien eta sortzaileen bilaketa errazago egiteko gure hizkuntza kontuan hartua izan dadin ekimen bat abiarazi duzue. Nortzuk eta nola?
Eskaera Nebukai sortzaileak egin zuen. Twitch plataforman hainbat filtro daude bilaketak egiteko eta aukeretako bat hizkuntza da, baina euskara ez da klikagarri dauden hizkuntzen artean aurkitzen. Boto bilketa bat dago martxan hori lortzeko, eta Game Erauntsian euskarazko bideo-jokoak sustatzen ditugun honetan eskaera hori zabaltzeko saiakeran gabiltza. Nebukaik post bat sortu zuen, eta guk bideo tutorial bat egin dugu non azaltzen den zein pauso jarraitu behar diren bozketa horretan parte hartzeko. Gure Youtubeko kanalean dago ikusgai. Artikulu bat ere prestatu dugu. Jakin behar da lortuz gero errazagoa izango litzatekeela euskarazko edukiak aurkitzea eta zabaltzea.

Eta nola doa boto bilketa?
Azken datuen arabera 319 pertsonak bozkatu dute eta gure nahia da hiru mila botora iristea. Katalanek lortu dute, eta 2900 boto baino apur bat gehiago elkartuta lortu zuten. Hori jakinda, hiru mila botoko erronka jarri diogu gure buruari. Pentsatzen dugu horiek lortuta ez litzatekeela arazorik egongo euskara ere hizkuntza aukera moduan onartua izateko.

Betetzen doaz zuen aurreikuspenak?
Kontuan izanda euskal hiztunak 700.000 bat garela poliki doan fenomeno bat da. Gero, esan behar da ez dela erraza botoa ematea. Ez da orrialde batean sartu, klik egin eta listo. Nork bere burua identifikatu behar du aurrez, eta horregatik daukagu eginda tutorial bat Game Erauntsikook. Hori jarraituz gero errazagoa da. Egitasmoari bultzada handiagoa emateko lan talde bat sortu dugu ekimena ezagutzera emateko eta jendea botoa ematera animatzeko.

Ze aukera zabalduko lituzke euskara kontuan hartua izateak?
Twitch barruan bilaketak egiteko bilaketa filtroak daude, eta horien artean hizkuntza filtroak. Euskara ez dagoenez euskaraz dabilen erabiltzaileren bat lokalizatzeko zailtasunak daude. Ezagutu eta bere izen espezifikoarekin bilatu behar duzu. Aldiz, filtro hori edukiko bagenu eta euskarazko sortzaileak bilatzeko helburua bagenu euskara klikatu eta euskarazko sortzaileen zerrenda agertuko litzaiguke. Horrek, noski, ikusgarritasuna ere emango liguke. Hori da jokoan dagoena.

Euskarak ze presentzia du Gamer munduan? Komunitate bat badagoela esango zenuke?
Egia esan behar bada uharte txiki bat gara. Mundu mailako bideo joko industrian hizkuntza nagusiak erabiltzen dituzte. Industria bat izanik diru etekina bilatzen dute, eta hori horrela ingelesa eta gazteleraz erabiltzen dituzte, gehienbat. Munduan gehien erabiltzen diren hizkuntzak direlako gertatzen da hori. Mundu hau horrelakoa da. Gertatzen da batzuetan aukera egoten dela euskarazko itzulpenak egiteko eta guk, adibidez, horretan dihardugu besteak beste. Baina egia esan euskara oso-oso-oso mugatua da mundu honetan eta une honetan.

Ingeleseko produktuak dira nagusi, orduan?
Industriak produktu gehienak ingelesez sortzen ditu, bai. Gero, beste hizkuntza batzuetara egokitzen dituzte: gaztelera, portugalera, eta nahiz eta oso bestelako merkatua izan txinera ere aipatuko nuke.

Euskaraz jarduten duzuenok zenbat zarete gutxi gorabehera? Ze oztopo dituzue?
Euskaldunak badabiltza baina Youtuber-Streamer fenomeno horretan jardun nahi duten euskal hiztun gehienek gaztelerara jotzen dute ikusgarritasun handiagoa lortzeko helburuarekin. Badago jendea euskaraz ari dena. Esaterako, Game Erauntsiko landekideok beti euskaraz egin dugu. Batzuk lehenagotik genbiltzan baina taldea 2014an hasi zen Youtuben, eta ordutik ia 800 Game-Play baino gehiago dauzkagu igota, zuzenekoak ere egiten ditugu aldian-aldian… Baina nahiko fenomeno txikia gara. Ez dakit hamar pertsona izatera iristen garen.

Euskarazko erreferente falta dagoela esango zenuke?
Mundu honetan gabiltzanok ez dugu gure burua erreferentetzat hartzen. Euskaraz egin dugu beti eta hortxe dago hori, baina egia da euskarazko influencer edo erreferente baten izenik ezin nizukeela eman konparatuta, batez ere, Espainiako edozein Youtuber handik duen oihartzunarekin.

Katalunian lortu dute katalana aintzat hartzea.
Bai. Uste dut iaz lortu zutela. Katalan hiztun kopurua handiago da; hamaika milioi dira. Indarra egiteko orduan ere badago aldea, baina han ere badute Game Erauntsia moduko talde bat gure zeregin berdinean dabilena.