Egunotan dabil sare sozialetan Libération egunkari frantziarrak gogora ekarritako ikerketa baten emaitza. William Bird doktorearen 2007ko ikerketa bat da, Royal Society for the Protection of Birds aldizkarian argitaratutakoa.

Ingalaterrako lau belaunaldiko haurren autonomia perimetroa aztertu zuen doktoreak eta horren bilakaera ondorioztatu zuen. 8 urterekin familiako kideek bakarrik egindako joan-etorriak kartografia batean jaso zituen Birdek.

  • Birraitonak 9 kilometro egin zituen oinez, 1919an.
  • Aitona basoan ibil zitekeen etxetik 1,5 kilometrora, 1950ean.
  • Alaba 800 metrora zegoen igerilekura joan zitekeen, 1979an.
  • 2007an, autoan eramaten zuten semea eskolara eta bizikletarekin ezin zuen etxebizitza zeukan kaletik irten, 300 metro baino gutxiagora.

Edorta Berguak ondo jasotzen duen moduan: Haurren oinezko autonomiaren bilakaera 4 belaunaldi ingelesetan:

  • 1919 ➔ 9 km
  • 1950 ➔ 1,5 km
  • 1979 ➔ 0,8 km
  • 2007 ➔ 0,3 km

Ematen du zer pentsatua, ezta?

Adingabeei modu autonomoan mugitzeko gaitasuna murriztu diegu, eta gurasoen eskolta gero eta handiagoa da joan-etorrietan. Joera hori argi eta garbi islatu da haurrek autoz egiten dituzten bidaien gorakadan.