Eskola Digitalaren VI. jardunaldiak egingo dituzte azaroaren 25 eta 26an.  Martxoan ziren egitekoak, baina egoerak behartuta, bertan behera geratu ziren. HEIZEk eta EHIGEk antolatu dituzte, eta helburua argia da: eskola-komunitateek –hezkuntzaren hobekuntzan inplikatutako eragile guztiekin batera– ​etorkizuneko eskola irudikatzea. Lurdes Imaz EHIGEko kideak eta Josu Etxaburu komunikazio arduradunak eman dituzte xehetasunak.

Zer dira Eskola Digitalaren jardunaldiak?

Josu Etxaburu: Orain dela sei urte antolatu genituen lehenengo aldiz, eta ordutik urtero egin ditugu. Konpetentzia digitalak sortutako kezka handi batetik abiatuta, jauzi kualitatibo bat ematea erabaki genuen. Motel genbiltzan, eta trena hartu behar genuela pentsatu genuen. Gainera, Hezkuntza Saila molde zaharrak errepikatzen ari zela ikusten genuen; benetako apustu eraginkorra falta zen. Hala, EHIGEk eta HEIZEk, eragile bezala, zerbait antolatzea erabaki genuen.

Zein izan zen lehenengo pausua?

J.E: Hasiera batean, kanpoan egiten diren ekitaldiak egitea pentsatu genuen, baina ez ginen bat etortzen. “Azoka bat antolatzera goaz?”, “Tresneria erakutsiko dugu bakarrik, eta bakoitzak bere negozioa egin dezala?”. Nik uste dut oso modu bizian eta eraginkorrean jokatu genuela, proposatutako planteamenduarekin: tresnak ezinbestekoak izango dira, baina tresna horiekin zer egiteko gai garen ikusi behar dugu.  Pedagogiari buelta bat eman nahi izan genion, eta inklusioaren bidean pausoak eman.

Lurdes Imaz: Bai, hori da. Gure helburua hasieratik izan da digitalizazio prozesuetan ikastetxeei laguntzea. Horretarako sortu ziren jardunaldiak; digitalizaziorako bidea egiten laguntzeko. Eta horretarako, adituen hitzaldiak eta tailerrak baliatu ditugu, besteak beste. Gainera, azpimarratu behar da ardatz kontzeptual batzuk ditugula oinarri; esaterako, Josuk aipatu duen inklusioarena.

Aurtengo jardunaldietara begira, zehazki bost ardatz finkatu dituzue. Zeintzuk dira?

L.I: Lehenengo ardatzaz hitz egin dugu: inklusioarena beti izan dugu oso argi; ikasle guztiak kontuan hartzea, alegia. Izan ere, arlo honetan, oso aurreratuta dauden ikastetxeak daude, baina baita “maila baxuago batean” daudenak ere, hortaz, garrantzitsua da denak kontuan hartzea.

Bigarren ardatz kontzeptualak konfinamenduan ikasi dugunari egiten dio erreferentzia: itxialdian identifikatutako ahulezietatik hezkuntza politika berriak egin behar direla uste dugu. Adibidez, Hezkuntza sailburuak aste honetan esan duen bezala, ezinbestekotzat jotzen dugu eskola bakoitzak bere Plan Digitala izatea. Eta nola ez, argi dago formakuntza ere behar dela, besteak beste (bai irakasleentzat eta bat familientzat).

Bestetik, hirugarren ardatzak kontuan hartzen du ikastetxeak toki seguruak izatea; oso arduratuta gaude ziber-segurtasunarekin eta pribatutasunarekin, eta horri heldu behar diogula uste dugu.

Laugarrena, euskara da.  Horren inguruan hitz egitera Miren Dobaran etorriko da. Guretzako oso inportantea da euskarazko materiala sortzea, eta mundu digitalean ere euskararen presentzia bermatzea.

Bosgarrena eta azkena ‘ikerkuntza, hobekuntzaren palanka’ izenekoa da. Ebidentzia zientifikoetan oinarritutako hezkuntzaren garrantziaz arituko gara, besteak beste.

Hortaz, bost ardatz horien bueltan, enpresak eta adituak izango ditugu hitzaldiak ematen, ikastetxeetako esperientziak partekatuko ditugu eta tailerrak ere egingo ditugu.

Zein da jardunaldien helburu nagusia?

L.I: Pandemiaren ondorengo eskola bat irudikatzea da helburua. Behar handiak genituela esaten ari ginen, eta behar horiek begien aurrean jarri dizkigu pandemiak. Dena den, argi daukagu pandemiarik gabeko sasoirako eskola irudikatu nahi dugula.

J.E: Seigarren topaketa hauek martxoan egin behar ziren, eta ez genuen aukerarik izan. Eta are gehiago, pandemia honek egun batetik bestera hezkuntza berridaztera behartu gintuen. Hala ere, gehitu nahi dut itxialditik ere ikasi dugula, eta Lurdesek esandakoaren bidetik, aurretik genituen premiak azaleratu dituela: adibidez, arrakalen kontua. Ikusi dugu arrakala digitalak eta bestelako arrakalek nola baldintzatzen duten ikaslea. Hortaz, beste itxialdi bat badago, behintzat harrapa gaitzala ahalik eta baldintza egokienetan.

Nola irudikatzen duzue zuek “etorkizuneko eskola”?

J.E: Lehenengo eta behin, presentzialtasunetik. Behin eta berriro esaten ari gara ikasleentzako oso garrantzitsua dela eskolaren ingurua. Izan ere, pandemiak erakutsi duen beste gauza bat da eskola instrukziotik harago doala. Nire inguruan galdetu nuen eta ikasleak institutura bueltatzeko gogoa zuten. Dena ziurgabetasuna den testuinguru honetan, ematen du iraultzailea dela presentzialtasuna aldarrikatzea. Ez da ezer berria, baina orain berritzailea da.

Bestetik, lehen adierazi dugun bidetik, etorkizuneko eskolek Digitalizazio Plana edukitzea oso garrantzitsua izango da. Eta horrekin batera, funtsezkoa iruditzen zait ikastetxe publikoen barruan, ikastetxeek elkarri laguntzea. Hezkuntza Sailari eskaerak egitea ondo dago, baina agian beste sare batzuk ehundu behar dira ikastetxeen artean ere. Bukatzeko, –eta hau ere esan dugu– formakuntza izango da gakoa.

L.I: Bai, eta hezkuntza komunitate bezala funtzionatzea. Konfinamenduaren eraginez,  bakoitza bere etxean egon da, eta, hein batean, komunitatearen zentzua galdu da. Jardunaldietan komunitateko kide guztien parte-hartzea sustatzen dugun moduan, gure egunerokotasunean ere egin beharko dugu. Berriz errekuperatu behar dugu komunitatearen kontzeptua. Elkarlan handiagoa behar da guraso, irakasle eta komunitate osoarekin.

J.E: Hori da. Bakoitza berera ibiltzea amaitu egin beharko da, eta zenbat eta lehenago konturatu, hobe. Halere, horri lotuta, azken urteetan ahalduntze bat izaten ari garela ere esango nuke, eta jardunaldiak oso topaleku interesgarriak izaten dira hausnarketak egiteko eta Euskal Eskola Publikoaren aurrera pausuak identifikatzeko.

Nola eman daiteke izena jardunaldietan?

L.I: Datorren astean irekiko dugu izena emateko aukera, eskoladigitala.eus webguneetan eta EHIGEern eta HEIZEren webguneetan. Oraindik webgunea berriz antolatzen eta eguneratzen gabiltza. Hitzaldiei buruzko informazio praktikoa txertatuko dugu, eta aukera egongo da bakoitzean izena emateko.

Online izango dira?

L.I: Gure asmoa gauza batzuk online eta beste batzuk aurrez aurre egitea zen, baina azken neurriak direla-eta, online izango dira denak. Hori bai, hizlari guztiak toki fisiko berean eta batera egotea nahi genuen. Oso garrantzitsua dela uste dugu. Martxoan 500 lagunek eman zuten izena; ea lortzen dugun berriz ere horiek guztiak animatzea.

Etiketak: