Hik Hasi egitasmo pedagogikoak 25 urte betetzen ditu ikasturte honetan, eta egoera gozoa ez bada ere, ospatzeko arrazoirik badela iruditu zaie bertako kideei.

Atzo, azaroaren 4an, urteurrenaren aurkezpena egin zuten Donostiako Koldo Mitxelena Kulturunean. Bertan, 25 urte hauetako errepasoa egin zuen Ainhoa Azpirotz Hik Hasikide eta kazetariak.

“Eremu guztietan eta sare guztietan, izan ikastola, eskola publiko edo bestelako, guztien berri eman izan dugu lekuan lekuko esperientziak jasoz”.

Ainhoa Azpiroz

Sorrerako urte haietan zegoen beharrak, nahiak eta gogoak bultzatuta sortu zen Hik Hasi, azaldu du Azpirotzek: euskal irakaskuntza edo hezkuntza kanpotik inposatzen ziguten sistema; batean barruan zegoen; hizkuntza gutxitu batean; euskaraz ez zekien irakasle askorekin; zatituta; funtzionatzen ez zuten hizkuntza-eredu batzuekin; gure curriculuma garatu gabe; bertan sortutako material gutxirekin, dena inportatuz, argitaletxe nagusienak ez ziren bertakoak; eskoletan erabiltzen zen material askok eta askok edo gehienek EuskalHerritik kanpoko erreferenteak zeuzkaten; ikastola batzuen publifikazioaren ondoren giro nahasia zegoen; ikastolak ahulduta eta publifikatutakoak noraezean. Egoera horretan, eztabaidatzeko, trinkotzeko eta denok elkarrekin erronkahorietan guztietan aurrera egiteko premia sumatzen zen han eta hemen”. Hezkuntza eremuko hainbat tokitan su txikiak sortzen ari ziren, eta horiek batzea, forma ematea eta abiatzea lortu zuen Joxe Mari Auzmendi zenak. Eta horrela abiatu zen Hik Hasi.

 Ondoren, Xabier Sarasua irakasle eta Hik Hasikideak duela hiruzpalau urte aurkeztutako Hezkuntza Proposamenean oinarri duen Hezkuntza Adierazpena aurkeztu zuen. Guk guraso.eus era ekarri dugu adierazpena.

Hezkuntza adierazpena

Itun sozial bat behar dugu, Euskal Herriak dituen hezkuntza-erronkei erantzuteko, eta zoru pedagogiko eta etiko berri bat ezartzeko.

Itun sozialerantz abiatzeko, Hik Hasik Hezkuntza Adierazpena gizarteratzen du, hezkuntza komunitatearen hausnarketarako.

COVID-19aren krisiak hezkuntza kolokan jarri du. Euskal Herri osoko eta sare guztietako hainbat ikastetxerekin hitz egin genuen ikasturte hasieran, eta esan ziguten protokoloek eta kontingentzia planek lekua eta denbora kendu ziotela hezkuntzari eta pedagogiari, eta pedagogiara bueltatzeko premia zegoela. Bide horretatik, hezkuntzaren zimenduetara joateko premia ikusi du Hik Hasik. Urteak daramatzagu hezkuntza komunitatearekin Hezkuntza Proposamena lantzen (irakasle, hezkuntza eragile, sindikatu eta herri mugimenduekin hausnartu eta partekatu dugu Hezkuntza Proposamena) eta orain, egoerari erantzuteko elkar hartu behar dugula ikusten dugu, zoru etiko eta pedagogiko berri bat garatzeko. Zoru hori finkatzeko ongarri gisa, Hezkuntza Adierazpena gizarteratzen dugu.

Zoru etiko eta pedagogiko berria behar da Euskal Herriak une honetan dituen hezkuntza erronkei erantzuteko, eta zoru hori finkatzeko, itun sozial bat behar dugu hezkuntzaren inguruan. Horretarako, lehenengo, hausnarketa partekatua behar dugula uste dugu. Hezkuntza Adierazpen honen helburua hausnarketarako gakoak mahai gainean jartzea da (Euskal Herriak behar duen hezkuntza-sistema inklusibo eta komunitariorako oinarriak xehetzen dira bertan). Zoru etiko eta pedagogiko berri horretara iristeko, eragile, ikastetxe, sare eta gizabanako guztien artean konfiantza eta lankidetza sustatu behar dugu. Hezkuntza komunitatea osatzen dugun guztion konpromisoa behar dugu, bakoitzak bere eremuan eta udalerrian lan egin dezan, betiere Euskal Herriari begira.

Badakigu zein une zailetan dagoen hezkuntza komunitatea, COVID-19ak eragin duen krisiaren ondorioz. Eta badakigu ez dela erraza izango protokolo eta kontingentzia planez haragoko elkarrizketarik planteatzea. Hala ere, hezkuntzaren iparrari eusteko premia ikusten dugu, eta hezkuntzaren zimenduez hausnartzera gonbidatzen ditugu hezitzaile eta eragileak, eta erakunde eta herri mugimenduak. Une honetan premiazkoa ikusten baitugu itun sozial bat Hezkuntza komunitate osoarentzako zoru partekatu berri baten alde, eta hori elkarrekin pentsatu eta gauzatu behar dugu.

COVID-19ak eragin duen krisiari erantzuteko, hainbat mugimendu abian jarri dira, (Oinherri, Haurrak ere bai, Gasteizko Hezkuntza plazara adierazpena…). Adierazpen hau ekarpen horiek osatzera dator, hezkuntza-oinarriei buruzko hausnarketa sustatuz, hain zuzen. Itun sozial hori lantzeko, eta bide horretan behetik gorako urratsei ekiteko, tokian tokiko hezkuntza komunitateak gonbidatzen ditugu hausnarketa kolektiboak abia ditzaten, Hikhasiren Hezkuntza Adierazpena (edota Hezkuntza Proposamena osoki) abiapuntu gisa hartuta. Jakinik ere une honetan hezkuntza komunitatean bizitzen ari garen krisia zeinen gogorra den, komunitate horrek iparra ez galdu ez dezan itsasargi lana egiteko bokazioz ondu du Hik Hasik Adierazpena.

Hezkuntza adierazpena zabaldu dugu dagoeneko lurralde guztietako eta sare guztietako ikastetxeetara, baita hezkuntza eragile eta sindikatuei, eta Hik Hasi komunitateko bost mila irakasleri ere. Ateak zabalik ditu Hik Hasik haien guztien gogoetak jasotzeko (aldizkaria@hikhasi.eus helbidean). Era berean, eragile guztiak formalki gonbidatu ditugu hausnarketa kolektiboetan parte hartzera (2021eko urtarrilaren 21ean Iruñean eta 2021eko maiatzaren 20an). Eta gaurtik aurrera, administrazioei, erakunde publikoei eta bestelako gizarte eragileei ere zabalduko diegu hausnarketarako gonbitea.

2020-10-22, Hernani. HIK HASI Egitasmo pedagogikoaren 25. urteurrena. 22-10-2020, Hernani. 25 aniversario del proyecto pedagógico HIK HASI.

Hik Hasitik adierazi dutenez, adierazpen honen helburua hausnarketarako gakoak mahai gainean jartzea da (Euskal Herriak behar duen hezkuntza-sistema inklusibo eta komunitariorako oinarriak xehetzen dira bertan) : “Zoru etiko eta pedagogiko berria behar da Euskal Herriak une honetan dituen hezkuntza erronkei erantzuteko, eta zoru hori finkatzeko, itun sozial bat behar dugu hezkuntzaren inguruan.

Horretarako, lehenengo, hausnarketa partekatua behar dela uste dute. Hezkuntza Adierazpen honen helburua hausnarketarako gakoak mahai gainean jartzea da (Euskal Herriak behar duen hezkuntza-sistema inklusibo eta komunitariorako oinarriak xehetzen dira bertan). Zoru etiko eta pedagogiko berri horretara iristeko, eragile, ikastetxe, sare eta gizabanako guztien artean konfiantza eta lankidetza sustatu behar dugu. Hezkuntza komunitatea osatzen dugun guztion konpromisoa behar dugu, bakoitzak bere eremuan eta udalerrian lan egin dezan, betiere Euskal Herriari begira.