Astelehenean gonak soinean zituztela joan ziren ikastetxera Oñatiko Zuazola-Larraña Institutuko hainbat neska-mutiko. Elkartasun keinua izan da 15 urteko Bilboko ikasle bati urriaren 27an gertatutakoa salatzeko. Mikel da mutiko hori, eta Kanadako hainbat ikastetxetan urrian sortutako mugimenduarekin bat egin eta ausartu zen gona soinean joatea ikastetxera.

Bere betiko nahia bete zuen baina ikaskideen irainak pairatzeaz gainera irakasle batek psikologoaren bulegora bidali zuen, eta hark galdetu zion mutila ala neska sentitzen zen.

Sare sozialen bitartez salatu zuen Mikelek gertatutakoa, eta asko izan dira berarekin bat egin eta ekintza berdina burutu duten ikasleak, tartean Oñatiko institutukoak.

Oñatiko Zuazola-Larraña Institutuko ikasleen eta zuzendaritzaren ahotik jaso du albistea Goienak.