Maite Pagola Beroa elkarteko gizarte langilearekin hitz egin dugu momentuko errealitatea ezagutzeko asmoz

Gure inguruan haur eta nerabe batzuk ez daude haurtzaro edo nerabezaro normal batez gozatzen. Uste baino gehiago dira. Eta behar baino gehiago sufritu dute: aldaketa zorrotzak, bakardadea, beldurra, ziurgabetasun handia. Hainbat arrazoirengatik familiekin bizi ezin diren haurrak eta nerabeak dira.

Horietako batzuk Gipuzkoako Foru Aldundiaren tutoretzapeko harrera-zentroetan bizi dira, eta, egunero arreta ematen dieten profesionalek behar bezala artatzen badituzte ere, ezinezkoa da familia batean ematen den berotasuna sortzea. Izan ere, 3, 8 edo 13 urte dituzunean, bizi beharko zenukeen leku bakarra etxe batean, familia batekin izan beharko zen, ume normal bat bezala.

Familietatik urrun bizi diren haur eta nerabeek gabezia asko dituzte, baina, guztien gainetik, maitasuna eta onarpena behar dituzte, IKUSGAITZAK izan gabe. Eta ez dute balio hainbeste gauetan lagun izan dituzten peluxe edo panpina zahar horiek besarkatzearekin, hezur-haragizko besarkadak behar dituzte. ZU BEHAR ZAITUZTE, ZUEK.

Gipuzkoan nola dago egoera?

800 haur eta gazte daude Harreran Gipuzkoan, 409 Harrera Egoitzetan eta 412 Harrera Familietan.

Zer behar da? Zein da mezu zuzena?

Harrera Familiak behar dira, 50 harrera familia borondatezkoak eta beste 10 espezializatuak.

Zein haur hartu behar dira?

Bere profilak oso ezberdinak dira, baina guztiak Gipuzkoako Foru Aldundiaren babespean daude. Honako hauek izan daitezke:

– Haurtxoetatik nerabeetara

– Bakarrik dauden haurrak, edo elkarrekin mantendu nahi diren anai-arreben taldeak.

– Portaera-zailtasunak izan ditzakete, bizi izan dituzten esperientzia negatiboengatik

Zer da harrera-familia izatea?

Laguntzeko modu bat da (haur edo nerabe bati) zure familian onartzea:

• Heziketa ematea, eta maitasuna

• Zure familian integratzen laguntzea eta familia-giroan bizitzeko aukera ematea.

• Nondik datorren zaintzea, maitatzea eta errespetatzea

• Bere familiarekin zergatik ez dagoen ulertzen eta berarekin harremanak izaten laguntzea, betiere beretzat ona bada.

Harrera ez da adopzio bat, ezta horretara iristeko urrats bat ere. Ez du bilatzen haurraren familia ordezkatzea, une oro errespetatu behar baita.

Harrera-familia mota desberdinak daude, eta zein izan nahi duzun aukera dezakezu, zure eskuragarritasunaren eta prestaketaren arabera.

Gipuzkoan familia-harrerarako bi programa ditugu:

Borondatezko familia-harrera

Pertsona edo familia batek, kualifikazio berezirik izan gabe, bere burua eskaintzen du haur edo nerabe bat (edo bat baino gehiago) hartzeko, eta bere gain hartzen du hura zaintzeko eta artatzeko erantzukizuna, profesionalen laguntzarekin harreran hartutako adingabearen ongizatea bermatzeko.

Familia-harrera espezializatua

Modalitate horretan, harreragileak edo familiako kideetako batek berariazko kualifikazioa, esperientzia eta prestakuntza ditu behar bereziak dituzten haur eta nerabeekin babes-eginkizunak betetzeko. Harrera bere lan profesional bihurtu nahi du, dedikazio osoz (nahiz eta egoera jakin batzuetan bateragarria izan daitekeen beste lan bat egitearekin), eta, horregatik, ordainsaria jasotzen du, harreran hartutako adingabearen ongizatea bermatzeko laguntza ematen dion talde bateko kide izanik.

Eta, harreraren aurreikusitako iraupenaren arabera, honako hau izan daiteke:

– Larrialdikoak (gehienez 6 hilabeteko iraupena)

Berehalako arreta behar duten haurrentzat da, eta oraindik aztertzen ari dira beren familiekin itzuli ahal izango diren. Hori baloratzen den bitartean, eta gehienez ere 6 hilabetez, haur horiek larrialdiko familia horiekin egongo dira.

– Aldi baterakoa (2 urtera arteko iraupena)

Haur eta nerabeen familiak, laguntza profesionalarekin eta horretarako lan eginez, seme-alabak ondo zaintzeko gai izan daitezkeen kasuetarako. Horregatik, aldi baterako harrerako familiek haur horiei laguntzen diete denbora horretan (gehienez 2 urte), beren familietatik kanpo egongo baitira, eta zaintzen dituzte, eta beren familietara itzultzeko prestatzen laguntzen diete.

– Iraunkorra (iraupen mugagabea)

Ikusi denean haurrak ezin izango duela familiarekin itzuli, haiekin askoz denbora gehiagorako egon nahi duten familiak bilatzen dira. 18 urtera arte iraun dezake.

Nor izan daiteke harrera-familia?

Abentura honetan murgiltzeko prest dagoen edozein pertsona edo familia.

Hori bai, beharrezkoa da:

• Familiako kide guztiak ados egotea

• Haurrak edo nerabeak etxean nahikoa leku izatea

• Nondik datorren errespetatzea eta bere ohiturekin eta familiarekin onartzea (izan ere, gehienetan familiarekin harremanak izaten jarraitzen dute bisitekin).

• Haurraren eta harreraren bilakaera une oro jarraituko duten profesionalen laguntza onartzea, gerta daitezkeen zailtasunak gainditzen joateko laguntza emanez.

Gainera, harrera espezializatuaren kasuan, bete beharreko baldintza batzuk daude:

– Diplomatura, lizentziatura edo gradua izatea Gizarte Hezkuntzan, Irakasletzan, Erizaintzan, Medikuntzan, Pedagogian, Psikopedagogian, Psikologian, Soziologian, Gizarte Langintzan, Gizarte eta Kultura Antropologian, edo, halakorik ezean, unibertsitatez kanpoko beste prestakuntza-gradu batzuk edo osasun-arloarekin, gizarte-komunitatearekin edo gizarte-hezkuntzarekin lotutako titulazioak.

– Gutxienez bi urteko esperientzia praktikoa izatea adingabeen arretarekin, zaintzarekin, hezkuntzarekin edo babesarekin lotutako eginkizunetan.

– Prestakuntza espezifiko osagarria izatea, egokia izango dena eta familia-harrerak behar edo egoera bereziak dituzten adingabeei dakarzkien erantzukizunak betetzeko gaituko dituena, pertsona harreragileek haurraren edo nerabearen interes gorenari erantzuteko beharrezkoa den laguntza eta arreta espezifikoa (errehabilitatzailea, terapeutikoa edo beste mota batekoa) eman ahal izateko.

– Harreran hartutako mutilaren edo neskaren arreta bermatzeko prestasun osoa izatea.

Eta bere jatorrizko familia?

Haurrak edo nerabeak familiarekin bizi ezin izateak ez du esan nahi familiarekin harremana galdu behar duenik. Horregatik, harremana haurrarentzat edo nerabearentzat ona bada, familiarekin bisitak egingo dira. Horrela, familiarekin lotura izaten jarraituko da eta, ahal izanez gero, familiarekin itzultzea erraztuko da.

Esan dezaket zer haur edo nerabe mota egokituko litzaidakeen niri? Aukeratu dezaket?

Harrera-familiak erabakitzen du azkenean haur jakin bat hartzeko proposamena onartzen duen ala ez.

Baina familia-harreran esku hartzen duten profesionalek baloratuko dute, zuekin egindako elkarrizketetan jasotako informazioa kontuan hartuta, zein haur edo nerabe sar daitekeen hobeto zuen familian.

Laguntzarik izango dut?

Beti

• Profesional-talde bat izango duzu, zure harreran gertutik jarraituko duena, zure alde eginez eta harreran sor daitezkeen zalantza guztiak argitzen lagunduz.

• Profesional horiek beharrezko erabakiak hartuko dituzte haurra edo nerabea eta zuek ondo egon zaitezten, eta harreraren une zehatzetan edo haurraren edo nerabearen behar zehatzetan lagunduko dizuete.

• Haurra edo nerabea edukitzeak eragin ditzakeen gastu ohikoenetarako laguntza ekonomikoa ere jasoko duzu, baita kasu zehatzetan aztertuko den laguntza bereziren bat ere.

Eta non kokatuko genuke BEROA ELKARTEA?

Gipuzkoako Harrera Familien Elkartea da eta behin harrera formaltzen denean borondatezko pausoa izango litzateke, bazkide egin eta beste 84 familiekin batera Harrera Familien eskubideak bermatzeko jokatuko genuke.

Zer eskaintzen duzue elkartean?

  • Hitzordu informatiboak eskeintzen dira, ordutegi zabala daukagu.
  • Harrerako une desberdinen inguruko informazioa, orientazioa eta aholkularitza, harrera familia gisa dugun esperientziatik.
  • FAMILIA-HARRERAKO ESTATUKO ELKARTEKO kide fundatzaileak, “ASEAF bere eskubideengatik”.
  • Elkarbizitza Jardunaldia, Gipuzkoako Harrera familien Topaketa, interesa dagoen gaietan urtean zeharreko formakuntza saioak eskeini eta antolatzen dira. Familiei aholkularitza eta baliabideka eskeiniz praktikara eramateko.
  • Arlo desberdinetako etorkizuneko profesionaleei formazio saioak: magisteritza, psikologia, gizarte hezkuntza, eta abar…
  • Heziketa-Berrikuntzako eta Berritzegune-ko Departamentuarekiko Kolaborazioa
  • Irteerak! Egitasmoa. Famili planak, egun-pasak, asteburu eta udarako udalekuak.
  • Etxegorria Elkarbizitza gunearen kuadeaketa.

Haur guztia irakurri ondoren, norbaitek interesa edukiko balu, nora jo behar du?

familiaharrera@gipuzkoa.eus

943112522

Bertan langile batek eskaera jaso, egoeraren berri emango dira eta jarraitu beharreko pausoak azalduko dizkio. Lehen kontaktu honek ez du konpromezurik, gaia gizarteratzen ari gara eta jendeak jalkin dezan zer nolako egoera dugun Gipuzkoan.

Guraso.eus en Beroa elkartea eta harrera familien inguruko eduki gehiago

Harrera familiak. Bi elkarrizketa

Zer da harrera familia bat? Beroa elkartekoekin elkarrizketa

Bizipoza: Beroa elkartea