Gloria Colli pediatraren hitzak dira, eta hotzeriari buruz ari da. “Ikerketa baten arabera pertsona argiagoak bihurtzen dira haurtzaroan oinutsik ibiltzeko aukera duten umeak; izan ere, oin biluziek lurrarekin duten esperientzia sentsorialak nerbio-zelulen estimulu gisa balio du. Nik gehitzen dut haurrak ez direla gaixotzen oinutsik joateagatik; izan ere, birusak ezin dira oinetatik sartu”.

Pediatrak argi dauka guraso askoren kezka dela eta beldur direla seme-alabek zapatarik gabe ibiltzeko duten joerarengatik. “Hotzeriaz gaixotzeko, katarro bat hartzeko edo goiko arnasbideen infekzio bat garatzeko ezinbestekoa da birus bat goiko arnasbideetatik sartzea –ahoa edo sudurra–, eta mukosan instalatzea. Pertsona gaixoetatik pertsona osasuntsuetara igarotzen da birusa: eztul egitean edo hitz egitean botatzen ditugun listu-tanta txikien bidez. Hortik ondorioztatzen da nahitaez egon behar dela gaixotasuna transmititzen duen pertsona bat. Beste aukera da tantatxo horiekin kutsatutako gainazalen bat ukitu izana, eta gero eskuak ahora eraman izana”.

Adituak gogorarazten du birusek basodilatazio-erreakzioa sortzen dutela mukosan, eta areagotu egiten dutela iragazkortasun baskularra zein mukiaren jariakina. “Horiek izaten dira sintomarik argienak. Baina, hotzak, faktore fisikoa den aldetik, ez du horrelako efekturik eragiten. Klima hotzetan mundu guztia egongo litzateke gaixorik!”.

Aire hotzaren eragina

Sudurretik igarotzean aire hotzak eragiten duena mukosaren basokonstrikzioa da, eta horrekin batera erantzun immunea murriztea. “Eta egia da egoera biek erraz dezaketela birusaren sarrera eta gaixotasunaren garapena. Bestela esanda, aire hotza arnasten ari garenean hotzeriak dagoen pertsona bat baldin badugu aldamenean posible da kutsatzea. Baita ere hark erabili eta kontaminatutako objektu bat ukitu izana. Baina ez dugu hotzeria harrapatuko ilea bustita daukagula kalera irteteagatik, goiza galtzerdi hezeekin pasatzeagatik edo egun osoa marmolezko zoru gainean oinutsik ibiltzeagatik. Hala, umeak ez dira oinutsik joateagatik gaixotzen”.

Argazkia: Gabby Orcutt