Ludotekarik ez dagoen auzoetan egiten du Txatxilipurdi elkarteak ludoteka ibiltaria, eta zapatu goizetan aisialdiaz gozatzeko aukera ematen die 3 eta 12 urte arteko neska-mutilei. Balio hezitzaileak sustatzeko ekimena dela azpimarratzen dute antolatzaileek: “Parte-hartzea, autonomia, sormena, konfiantza, hezkidetza eta naturarekiko errespetua jorratzen ditugu; euskaraz, betiere”.

Era berean, auzotarren artean harremanak egin eta elkar ezagutzeko gunea ere eskaintzen dute; “Hiru hezitzaile izango dituzte bidelagun, eta beharrezko baliabideak eskainiko zaizkie”.

Aurten, izena eman behar

Pandemia egoera dela-eta hainbat egokitzapen egin behar izan dituzte, baina egitasmoarekin aurrera jarraitzeko apustua egin dute. Osasun neurriak hartuko dituzte. Besteak beste, 6 urtetik gorakoek maskara eraman beharko dute eta segurtasun neurriak zainduko dituzte egiten diren jardueretan.

Esaterako, beste urteetan ez bezala, aurten izena emateko deialdia ireki dute hezitzaileek, partaide bakoitzari bi zapatutan apuntatzeko aukera emanda. Guztiek tokia izan dezaten, taldekatzeak egingo dituzte. “Larunbat bakoitzean 18 haur edo nerabek parte hartuko dute, eta, leku hauek bukatzean, itxarote-zerrenda bat egingo dugu, norbait joan ezinean geldituz gero, hurrenkeran tokatzen zaionari abisatu ahal izateko. Beraz, garrantzitsua izango da izena eman eta joateko aukerarik ez dutenek aurrez abisatzea”, azaldu dute.

Iturria: Goiena.