Liburuak, abestiak, ipuinak, olerkiak… Hainbat baliabide jasotzen ditu HitzKeta.eus atariak. Teknologia berriez baliatuta euskal kulturaren sustapenean eragiteko egitasmoa da.

Orain hiru urte abiarazi zuten Haur Hezkuntzako graduko azken urtean zeuden lau ikaslek. Bere horretan utzi zuten, baina pandemia etorri zen gero, eta bizia hartu zuen, berriz ere, egitasmoak. “Teknologia berriekin zerikusia zuen proiektu bat garatzeko eskatu ziguten, eta nabaritzen genuen hutsune bati erantzuna emateko sortu genuen HitzKeta.eus. Gero, etenda moduan egon zen baina pandemia etorri zen eta bizia hartu zuen berriz. Haurrak etxean zeuden, batzuk euskararekin zuten kontaktua galtzen… Elkartu eta pentsatu genuen elikatzen jarraitzea”, azaldu du lau sortzaileetako bat den Maddi Murgiondo Moiuak.

Liburu bilduma, olerki bilduma eta abesti bilduma dira HitzKeta.eus atariko atalik nagusienak, baina proposamen didaktikoak ere eskaintzen dira, sarean dagoen materiala nola landu proposatuz. Webgune interesgarrien zerrenda eta bideoak ere jasotzen dira bertan.

Proposamenen atala ere badago. “Bertan biltzen dira jendeak bidalitako proposamenak”, azaltzen du sortzaileen taldeko Miren Puertas Abaunzak.

Webgunea gazteleraz ere badago. Erdal familiei begira eginda dagoela azaltzen dute sortzaileek.

Egitasmoak erantzun ona izan du eta hileroko buletinera harpidetzeko aukera ere ematen du. Madrildik, Kataluniatik, Valentziatik. Ameriketako Estatu Batuetatik, Uruguaitik… jaso dituzte proposamenak edo esker mezuak. Baita ere Boiseko ikastolatik.

Bideoaren iturria: Goiena.eus.