Guraso.eus-ek eta Txatxilipurdik #PutzuetanPlast ekimena abiatu dugula aitzaki hartuta, putzuek ematen dizkiguten aukeren inguruan hausnartu eta arlo honetan sakontzeko aprobetxatzen ari gara hilabete hau. Dagoeneko, hiru sarrera gehitu ditugu putzuen inguruan: Zergatik jolastu kanpo espazioan euria dagoenean?; Goazen putzuen bila! Putzuetan plast! eta Eguraldi euritsua? Jantzi arropa egokia eta irten jolastera!

Gaurkoan, beste begirada batetik begiratu nahi diegu putzuei. Putzuak, bereziki naturguneetan sortzen diren putzu edo urmaelak, biodibertsitatearen iturri dira, inguruko espezieen biziraupenerako ezinbesteko. Euskal Herrian, Aranzadi Zientzia Elkarteak urmaelen funtzio naturalari, dibulgaziorako eta hezkuntzarako funtzioa gehitu die, eta Eskoletako Urmaelen Sarea ari dira josten:

“urmaelak hezkuntzan ekosistema baten modelo batean bilakatu daitezke eskola inguruko eremuan, funtzionamendu ekologikoaren inguruko kontaktu zuzena ahalbidetzen duten ikerketa eta behaketa jarduera ezberdinak egiteko. Hau da, ikasleentzako laborategi natural erakargarriak izan daitezke, hainbat eduki eta konpetentzia lantzeko gune egokiak. Nahiz eta tamaina txikikoak izan, ekosistema baten egitura eta funtzio guztiak barne biltzen ditu: segida ekologikoak aztertu daitezke, espezieen arteko harremanak, biodibertsitatea eta honetarako kontserbazio estrategiak lantzea ahalbidetzen du era berean.”

Urmaelak eskola ingurunean sortzeko proiektua abiatzeak hurrengo onurak ekar ditzake:

  • Eskoletako ikasle eta irakasleek ikasturtean zehar landu beharreko eduki asko in situ behatu eta aztertzeko aukera dute bertan.
  • Zientzialariak informazio biltegi primerakoa izan daitekeen eremu berri bat sortzen du bertako datuak bildu eta Euskal Herriko datu basearen parte izan daitezkeenak.
  • Herritarrak azken hamarkadetan desagerrarazi ditugun inguruneak (mikrohezeguneak) berreskuratuko dira.
  • Bizidunak, batzuk derrigor putzuak behar izaten dituztelako ugaldu eta biziraupena bermatzeko (anfibio, burruntzi edota sorgin orratzak kasu), eta bizidun lehortarrak ura edan edota bazka lortzeko eremu aproposak sortuko dira.

Dagoeneko 12 hezkuntza proiektu sartu dira egitasmo honetan eta martxan duten webgunean askotariko bitartekoak jarri dituzte proiektuan interesa duen edozein hezkuntza komunitateek urratsak emateko.

Jarraian, Eñaut Aiartzaguenak  (Irribarrez), gai honen bueltan HIKHasi-rako egindako komikia ekarri nahi izan dugu hona: Urmaelak eskoletan: zertarako?

Azkenik, PutzuetanPlast! ekimena gaiarekin lotuz, baso-igel errute eder bat jasotzen duen argazkia jaso dugu.