Ama naizenetik desberdin bizi dut martxoak 8a. Lehen niretzat emakume bezala garrantzitsua zen eta amatasunak zeharkatu ninduenetik ardura handiagoz bizi dut; eta aurtengoan gehiago sentitzen dut erresumina.

Beti saiatu naiz etxeko txikiak genitaletatik harataho ikusten eta hezten. Gauza txiki zein handietan arreta jarri eta berdintasunaren baloreak transmititzen. Euren gorputza errespetatzen: ilea zurea da eta zakila izateagatik ez dizut moztuko zuk nahi ez baduzu. Zure belarriak zureak dira eta ez dizkizut zulatuko alua izateagatik. Zure gorputza da eta ukitu aurretik baimena eskatuko dizut. Zure arropak dira eta zuk hautatuko dituzu.

Etxean denok egiten ditugu etxekolanak, bakoitzak bere gaitasunen arabera.

Eta bihotzak krask egin zidan kolore arroxa asko maite zuen haurrak egun batean eskolatik itzultzean lagunek arroxa nesken kolorea zela esan ziotela eta ez zituela berak aukeratutako arropak gehiago jantziko esan zidanean. Unea probestu genuen generoaz hitz egiteko.

Bihotzak krask egin zidan haur ertainak neska eta mutila zela zioen garaian zakila zuenez lagubek komun batean sartzerik ez zuela esan ziotela kontatu zidanean. Zorionez horrek komunak ez sailkatzea eragin zuen.

Eta nik, ustez berdintasuna, hezkidetza eta ahalduntzea eta errespetua oso barneratuta nituen honek… aurten erresumin handiagoz bizi dut martxoak 8a. Hirugarren haurrak alua zuela esan zidatenetik ohartu naizelako nola nire baitan beldurrak areagotu diren. Zailagoa izango da bere nerabezaroa eta heldutasuna. Borrokatzen dugun berdintasun jendartea urrun dagoelako. Oraindik ARRAKALA izugarria delako.

Indarkeria askoz zeharkatuko dutelako tamalez bere bizitza… Sistema matxista, justizia matxista eta medikuntza matxista.

Urtero hartu dut haurrekin martxoak 8a eguneroko balore lanketa hori indartzeko akuilu gisa. Borroka honetan amatasun feministek sortuko dutelako jendarte askeagoa.

Amatasun feministak izan bitez sistema arrakalatzeko indargune gisa. Egunero egunero ARRAKALA handitu eta belaunaldi oso bat berdintasunean eta errespetuan heztean erabat aske izan gaitezen.