Txangoa familian: Zirautza ibaiaren iturburua (Araia – Araba)

Zailtasuna: txikia / Iraupena: ordu eta laurden / Ibilbidea: 4 km inguru / Goibehea: 250 m.

Txango erosoa eta polita.

Marra zuri-berdeekin ondo markatutako bidea (SL-A 14).

Gomendatutako urtaroak: udaberria eta udazkena.

Abiapuntua Araiako Intuxi auzoan dugu, San Pedro Zentral Hidroelektrikoa dagoen lekuan, Energia berriztagarrien museoaren ondoan. Eraikuntza ezkerraldetik inguratuz gero, haritzez osatutako baso polit batetara sartuko gara. Kontuz eremu hezeekin, zenbait lekutan bidea labankor egon daiteke-eta.

Minutu batzuk zuhaitzen itzalpean igaro ondoren, harri koskorrez egindako bide batera iritsiko gara eta ezkerrera joko dugu. Ajuria eta Urigoitia burdinola zaharraren paretik doan bide honek egurrezko atetzar batera garamatza.
Bidea jarraituta eta ezkerretara —25 bat metrora— metalezko iturria dago. Atzean utziko dugu aldapa txiki bat igotzeko. Goiko burdinola ikusteko gunea aurkituko dugu eta apur bat aurrerago atseden hartzeko gune bat mahaiekin.

Marka zuri-berdeak jarraituta bidegurutze batera iritsiko gara. Ezkerreko aldetik ibaiaren pare-paretik doan eta iturburu azpian dagoen ur-jauziraino iritsiko gara. Eskumako bidea hartuta Allondoko zubiraino igoko gara eta iturburura hurbilduko gara.

Argibide gehiago hemen.