Hazten doazen oinen osasuna

Podologia pediatrikoak umeen oinen alterazioak tratatzen ditu. Arazoak askotarikoak izan daitezke, baina gehien gehienak tratamendua dute.
Lesioak izan daitezke estrukturalak zein funtzionalak; izan ere, umeen oinak konplexuak dira. Ez dugu ahaztu behar garatzeko unean dauden hezur, artikulazio, ehun, muskulu eta nerbio-akabera ugari daudela, eta elkarrekin lan egiten dute gainerako gorputzaren mugimendua koordinatzeko. Oinak dira gorputzaren oinarria, eta horregatik da hain garrantzitsua funtzionamendua ziurtatzea.

Umeen oinek kartilago ugari dituzte, eta esan bezala hazten doaz. Ager daitezkeen arazo ohikoenak oinen deformazioarekin dute zerikusia. Hanturei eta garatxoei ere adi egon behar da.

Deformazio arazoak

Haurtzaroan eman daitezkeen oinetako deformazioei dagokienean hainbat patologia ager daitezke.
• Oin laua: kasu honetan oinak kurbadura edo arkua falta du. Maila desberdinak daude, eta neurketa egiten da oin-zolak lurzoruarekin duen kontaktuaren arabera. Halako kasuetan txantiloien edo plantilen erabilera gomendatzen da, eta hori 4 urtetik aurrera.
• Oin kaboa: oin lauaren kontrara oin kaboa ematen da arkua ohikoa baino handiagoa denean. Hau da, kurbadura edo arkua gehiegizkoa denean. Oinak ez du behar besteko malgutasunik, eta gorputzaren pisu banaketa ez da modu orekatuan egiten. Hala, pisu gehiena oinaren aurreko aldean pilatzen da, eta horrek mina eragiten du eta, askotan, gehiegizko tentsioa bikietan. Ohikoena da patologia hau 8-12 urte arteko adinetan agertzea, baina gerta daiteke jaiotzetik ere hautematea.
• Oin balgoa: orpoa kanporantz desbideratzen den kasuetan ematen den deformazioa da. Ibiltzerako eta batez ere korrika egiterakoan nolabaiteko ezegonkortasun edo baldartasun itxura eragiten du, besteak beste.
• Zaldi-oina: flexio-posizio iraunkor batean dagoen oina da. Hau da, orpoak ez du lurrazala behar moduan zapaltzen, eta hankaren ardatzari jarraituz beherantz luzatzen den oina da. Trizeps muskuluaren uzkurdura dago arazo honen iturrian. Hau da, Akilesen tendoia behar baino motzagoa da. Zaldi-oinak dituzten haurrak oin-puntetan ibiltzen dira.
• Oin baroa: oina barrurantz orientatzen den kasuetan ematen da, eta pisua kanpoko ertzetan eta azken hatzetan kokatzen da. Normalean, lotuta dago hankak eta belaunak kanpoko alderantz botatzearekin. Arazo gehiagorekin izaten du lotura, esaterako, oin kaboarekin, oin balgoarekin edota zaldi-oinarekin, eta baita ere prozesu neuromuskularrekin. Kasu gehienetan tratamendu kirurgikoa behar izaten da, eta ortopedia pediatrikoan espezializatutako profesionalengana jo behar da.

Oinetako hanturak

Hantura kasuak ere ager daitezke hazten ari diren oinetan.
• Talalgia: Akilesen tendoiaren hanturaren ondorioz orpoaren atzealdean ematen den afekzioa da.
• Severren gaixotasuna: hazteko prozesuarekin lotura duen afekzioa da. Hazkunde horrek tentsio muskularra eragiten du Akilesen tendoian, eta horren ondorioz hantura akutua ematen da kartilagoan.

Behatzen posizio txarra

Gerta daiteke, baita ere, umearen behatzek posizio txarra hartzea. Adi egon behar da halakoetan ere.
• Behatzek atzapar forma: behatzen oinarrian ematen den ezohiko flexio batek eragiten duen deformazioa da. Erdiko artikulazioa beherantz tolestuta dagoelako gertatzen da, eta horrek eragiten du ezohiko posizioa.
• Mailu-behatzak: kasu honetan flexionatutako artikulazioa erdikoa da. Horren ondorioz maila-itxura hartzen dute behatzek, eta hortik dator izendura.

Oin-zolako garatxoak

Ezagunak dira, baita ere, Papiloma izenarekin. Hasiera batean lesio txikiak dira, baina ez bada garaiz neurririk hartzen hedatzen joaten dira denborarekin. Itxura zimurtsua da, eta orban ilunak erakuts ditzakete azalean. Ez dute beti mina sortzen, baina askotan gogaikarriak dira. Ez dago tratamendu-uniformerik. Erabil daitezke azido salizilikoa, krioterapia, edota substantzia azidoekin egindako erredura. Kirurgia da muturreko aukera.

Oinekin eta ibilkerarekin lotutako arazo gehienak tratamendu errazen bidez konpon daitezke; ariketa egokituak, oinetako egokiak, txantiloi edo plantila pertsonalizatuak, ferulak…

Edozein kasutan haurren oinatzaren bilakaera ezagutzeak patologiak detektatzen lagun dezake, eta haurtzaroa da garairik onena zuzenketak egiteko. Berebiziko garrantzia du etorkizunean arazoak eta konplikazioak saihesteko.

Iturria hemen.