Gurutze Gorriak bero boladei aurre egiteko informazio-kanpaina jarri du martxan, Ni babestu egiten naiz leloarekin.

Kanpainaren helburua da tenperatura altuek biztanleen osasunean duten eragina saihestea edota murriztea, batez ere egoera bereziki ahulenean dauden pertsonen artean, eta bertan kokatuko lirateke haurrak. Baita adineko pertsonak eta etxerik gabekoak ere.

Beroak osasunari eragiten diola azpimarratu nahi izan dute lehendabizi kanpainarekin, eta hauxe azaldu dute: “Bero handiak gure tenperatura kontrolatzeko sistemari eragiten dio, hau da, gure barne-termostatoari. Normalean, bero egiten duenean, gure gorputzak izerdia sortzen du, eta izerdia lurrinduta gorputza freskatzen da. Baina, bero handia egiten duen egunetan, gorputzak ahalegin handiagoa egin behar du ohiko tenperaturan mantentzeko”.

Gaineratu dute, batez ere beroarekin tentuz ibili behar dela lau urte baino gutxiagoko haurrekin, izan ere, “berehalako hainbat ondorio” eragin ditzake. Gorputz tenperatura normal bat izatea lortzen ez badugu, zorabiatu egin gaitezkeela esan dute, kalanbreak senti ditzakegula, bero-kolpe bat izan dezakegula edo beroagatik nekatuta senti gaitezkeela.

Bero-kolpea

Hauek dira bero-kolpeari lotutako sintoma ohikoenak:

  • Tenperatura altua
  • Azal gorria, beroa eta lehorra
  • Pultsu fuertea eta bizkortua
  • Min taupakaria buruan
  • Zorabioa eta goragalea –konortea galtzera ere irits daiteke–

Berotik babesteko neurriak

  • Elikadura eta hidratazioa zaindu. Likido asko edan eta otordu arinak egin.
  • Janzkera zaindu. Arropa arina erabili, burua babestu eta eraman oinetako freskoak.
  • Kanpoko jarduerak. Saiatu goizeko lehen orduan edota iluntzean egiten. Eta bero askoko unetan kanpoan egon behar izanez gero, saiatu itzaletan egoten, eguzkitik babesten eta likidoak edaten.
  • Etxean. Egon gela freskoenetan eta jaitsi pertsianak eguzkia zuzenean sar ez dadin.
  • Bidaietan. Ez utzi inoiz haurrak itxitako ibilgailuan, erabili aire girotua edo zabaldu leihoak, bidaia luzeetan hartu atseden.
  • Eguzkitan jarriz gero, erabili eguzkitako babes egokia eta erabili eguzkitik babesteko betaurrekoak.

Zer egin gaizki sentituz gero?

  • Lortu laguntza medikoa.
  • Jaitsi gorputzeko tenperatura toki fresko batera eramanda eta urez bustitako trapuak erabilita.
  • Eskaini alkoholik ez duten edariak.
  • Konortea galdu badu, jarraitu lehen laguntzako oinarrizko protokoloei bizi-konstanteak mantentzeko eta lortu berehala laguntza teknikoa.
Gurutze Gorriak kaleratu duen kanpainako irudia.