Haurren elikadurak kezka ugari sortzen ditu gurasoengan, eta oraingoan zereal integralei buruz jardungo gara.

Ona al da haurrek elikagai integralak hartzea?

Bai, oso ona da, eta gainera, osasungarriagoa.

Zein adinetatik aurrera har dezakete ogi edo pasta integrala?

Elikadura osagarriarekin hasten garen unetik, hau da, 6 hilabetetik aurrera.

Nola eskaini zereal integralak?

Purea jaten badu, pasta integraleko eskukadatxo bat gehituz, adibidez, bere pureetan jaterako orduan. Edo ogi xerra integrala eskain diezaiokezu mastekatzen has dadin.

BLW egiten baduzue, pasta osoa eskain diezaiokezu zuzenean, ondo irakina, barazkiekin eta proteina iturriarekin batera. Komeni da BLW edo papilak izan, Harvard platoaren proportzioak errespetatzea: jaten duen errazioaren erdiak fruta eta-edo barazkia izan behar du, laurden batek proteina izan behar du –haragia, arraina, arrautza edo lekalea– eta laurden batek karbono hidrato iturria –zereal integrala, etab–.

Eta arroza ere integrala?

Arroz integralak, arroz zuriarekin alderatuta, artseniko handia du eta hobea da, kasu honetan, hiru urte bete arte arroz zuria ematea. Hiru urtetik aurrera, astean eskukadatxo bat arroz integral eman diezaiekegu.

Noiz arte har dezakete zereal integrala?

Beti arte. Ona da etxean zereal integrala kontsumitzeko ohitura hartzea.

Eta zereal integrala zergatik da osasungarriagoa betiko ogiaren edo pasta zuriarekin alderatuta?

Zereala fintzeko prozesuan, ogi zuri, arroz zuri edo zereal zuri bihurtzeko, salbatua –zuntzetan aberatsa den oskola– eta ernamuina edo germena –E bitaminan, B bitaminan, azido folikoan, fosforoan, zinkean eta magnesioan aberatsa dena– galtzen dira, hau da, zereal zuriaren nutrizio-balioa integrala baino askoz txikiagoa da.

Gainera, frogatuta dago zereal integralen ohiko kontsumoak hainbat onura dauzkala:

  • Osasun kardiobaskularra hobetzen du.
  • Murriztu egiten da bigarren motako diabetesa izateko arriskua.
  • Minbizi mota jakin batzuk saihesten ditu, hala nola, kolonekoa, ondestekoa eta urdailekoa.
  • Hesteetako osasuna hobetzen du, idorreria saihestuz, beste abantaila garrantzitsu batzuen artean.

Kontuz, komeni da argi uztea etiketetan zuntz-eduki handia duten produktuek ez dutela esan nahi integralak direnik, integralari buruzko zerbait irakurri, eta ondo argitzen ez bazarete, bilatu etiketan: osagai nagusia gutxienez irin integralaren % 75 bada, aurrera.

Eta adi beste kontu honekin ere: ogiak haziak edo pipak badaramatza, edo pasta kolore marroikoa bada, horrek ez du esan nahi integrala denik. Trikimailu hutsa izaten da batzuetan, produktua integrala dela simulatzeko.

Hori bai, ez galdu iparra, poliki egin aldaketa, hala nahi izanez gero. Eta batez ere seme-alabak zaharragoak badira, komeni da aldaketa mailakatua egiten joatea, ohituz joan daitezen.

Seme-alabak txikiak badira, aprobetxatu produktu integralak jateko, etxeko guztiok.

Iturria: hemen.