Euskadiko Orkestrak aurkeztu du 2021/2022 ikasturterako neska-mutikoei begira prestatu duen programazioa. Hiru ekoizpen aurkeztuko ditu hezkuntza-zikloan: Euskadiko Orkestra Cirkus, Living Room Music eta Botadun katua. Bestetik, zikloaren ardatz nagusi diren Eskola Kontzertuak eta Musika Familian kontzertuak entsegu ireki batekin eta beste jarduera batzuekin osatuko dira.

Pandemia kontuak tarteko programazio murriztua izan du Euskadiko Orkestraren hezkuntza zikloak. Baina bueltan dira, eta modu indartsuan, kontzertu didaktikoak, pedagogikoak eta gertukoak. Askotariko adin-taldeei zuzendutakoak dira, aurtengoan 3-12 urte tarteko gazteei.

Hiru produkzio propio

Hiru eskoizpen propio aurkeztuko ditu aurten Euskadiko Orkestrak. Bi formatutan aurkezten dira, Eskola Kontzertuetan eta Musika Familian kontzertuetan.

Euskadiko Orkestra Cirkus Publiko gazteenari zuzendutako kontzertu-ikuskizuna. Alaitasun eta fantasiazko eztanda da, musika dibertigarrien eta zirkuaren magiaren bidez.

Living Room Music Urtarrilean iritsiko da. Pasa den denboraldian arrakasta handia izan zuen. Lau perkusio-jolek eta aktore batek munduko edozein hiritako apartamentu batera eramaten dute ikuslea, konfinamenduari umore-ukitua emateko eta edozein objekturekin musika sortzea posible dela erakusteko.

Botadun katua Literatura unibertsaleko klasiko honekin Luis XIV.aren gorteko giroan murgiltzen du ikuslea. Per Poc txotxongilo-taldeak sortutako ekoizpen hau lehendabizikoz moldatu da euskarara Musika Gelaren baitan aurkezteko.

Eskola Kontzertuak eta Musika Familian saioak

Eskola Kontzertuetan HHko, LHko eta DBHko 9.000 ikaslek baino gehiagok hartuko dute parte. Ehun bat ikastetxeko ikasleak dira.

Musika Familian kontzertuak Donostian eta Gasteizen eskainiko ditu Euskadiko Orkestrak. Formatu honek 25 urteko ibilbidea du. Ikuskizunetarako sarrerek hemen eros daitezke. Dagokion aretoaren leihatiletan eta webguneetan (kursaal.eus, principalantzokia.org) ere egongo dira salgai. Donostiako kontzertuen sarrerak abenduaren 14an jarriko dira salgai eta Gasteizkoenak urtarrilaren amaieran.

Entsegu Irekia eta beste jarduera batzuk

Entsegu irekiak kolektiboei, ikastetxeei, kontserbatorioei eta unibertsitateei daude irekiak, besteak beste. Aukera eskaintzen dute orkestrak kontzertu baten aurretik egiten duen azken lana gertutik ezagutzeko. Denboraldi honetako Entsegu Irekia martxoaren 10ean izango da, 11:00etan, Kursaal Auditoriumean, eta bertan orkestrak Berliozen Sinfonia Fantastikoa interpretatuko du, Pinchas Steinbergen batutapean.

Orkestrak, bestalde, Musika Gelaren azken aldiko ekoizpen arrakastatsuenetako bat berreskuratuko du, Mozart, Nannerl eta Lagunak. Durangoko Musika Hamabostaldiaren baitan eskainiko dute azaroaren 27an, 19:00etan, San Agustin Antzokian. Ikuskizuna 3 eta 6 urte arteko haurrei zuzenduta dago.

Musika Gela YouTuben

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Mozart, Nannerl eta Lagunak, Ekomusik eta Isiltasunaren haitzuloa. Aurtengo kontzertuen bideoak ere igoko dira bertara, ikuskizunak gauzatu ahala.

2021/2022 denboraldiaren programazio osoa