Ibilbide zirkularra da eta Ataungo San Martin auzoan ditu irteera eta amaiera.

Joxe Migel Barandiaranekin lotura handia duen ibilbidea da. Oso gogoko zuen ibilbidea Barandiaranek berak, eta diote egunero egiten zuela bueltatxoa Gaztiñerreko depositura, ibilbidearen punturik garaienera.

7,3 kilometroko ibilbidea da, oso erraza egiteko. Pare bat ordu kalkulatu behar dira. Trazatuan ikusiko ditugu Peruenezar –Barandiaranen jaiotetxea–, Sara etxea –zendu zen arte urte askotan bizitoki izan zuena–, eta Larruntza errota, orain Barandiaran Museo bilakatu dena.

Ibilbidea seinale zuri eta berdeekin markatuta dago. Jarraitu Agauntza ibaiari itsatsita doan bidezidorra. Hartxintxar eta asfaltozko bidea da gehienbat eta San Gregorio auzoraino eramango zaitu.

Ibilbidea entretenigarria da; izan ere, ondo kontserbatutako baserrien aurretik igarotzen da. Nabarmentzekoa da Sara Etxea –Barandiaran bizi izan zen tokia–.

Bidean, gainera, baserriko askotariko animaliak ikus daitezke; zaldiak, ardi latxak, oilarrak… Bidean dago, baita ere, Barandiaran Museoa.

Argazkiak Ataungo Udala