Guraso euskaltzalez osatutako taldea da Arnas Dezagun. Bertako partaideak Euskal Herriko udalerri erdaldunetan bizi dira eta euren haurrak D ereduan dituzte ikasketak egiten.

Hauxe azaldu dute Bilbon egin duten prentsa agerraldian ekimenekoek: “Gure seme-alabak, euskal hiztunak izanik, gutxiengoa dira ikasgeletan, baina, elkarrekin jarri ordez, gela desberdinetan sakabanatzen dituzte ikastetxe gehienetan. Era horretara, sakabanaketaren ondorioz ume euskaldunei errotik ukatzen zaie euskaraz jarduteko aukera, non eta D ereduan. Horrela, oso denbora gutxitan zeharo erdalduntzen dira eta euskara bazter uzten dute, bai eskolan, bai handik kanpo ere.”

Egoera horri aurre egin nahian jarri dute martxan ekimena eta euren ildo nagusiak plazaratu nahi izan dituzte: “Irakasleen ahaleginak ahalegin, azken urteotan argi gorri guztiak D ereduan piztu dira. Ez da soilik eskolaren ardura, hala ere, eskola barik euskalduntzeak ezin du aurrera egin”, adierazi dute ekimenetik. Eta gaineratu dute herri erdaldunduetako D ereduko ikastetxetan etxetik euskara dakartenak “sakabanatu” egiten dituztela “sistematikoki”, horrela elkarren artean euskaraz egitea “ukatuz”.

Horregatik hiru eskari egin diete euskal ikastetxetako zuzendaritza eta administrazioei:

  • Haur euskal hiztunak ez sakabanatzea.
  • Arnasgune funtzionalak bermatzea. Hau da, euskaraz eroso jardun ahal izateko eremuak.
  • Haur erdal hiztunen euskara maila indartzeko eta erabilera errazteko baliabideak eta laguntzak.

Sinadura bilketa abiarazi dute eta ekimenari atxikimendua adierazteko, webgune honetan sinatu daiteke.