2015. urtean euskaratu zuen Txatxilipurdi elkarteak Berdean Hezi izeneko liburua. Liburua itzultzearekin batera abiatu zuen  izen bereko barne lan ildoa naturarekin zuten harremana aztertu eta berau areagotzeko ekimen ezberdinak sustatuz. Aurten 10 urte bete ditu liburuak eta aitzakia honekin 10 libururen zozketa abiatu du elkarteak.

Gaur hasi eta datozen hamar egunetan liburuko hamar aipu argitaratuko dituzte beraien sare sozialetan eta galdetegi baterako esteka ere gehitu dute mezu bakoitzean. Galdetegi laburra da betetzea eskatzen dutena eta  hiru galdera hauen erantzuna eskatzen dute.

  • Zer suposatzen du zuretzat naturan jolasteak?
  • Nahikoa harreman duzu naturarekin edo gehiago nahiko zenuke?
  • Pandemiak areagotu al du naturara gerturatzeko beharra zugan

Hamar egunez izango da  parte hartzeko aukera eta parte hartzaile guztien artean egingo da zozketa.

Heike Freirek liburuan honela dio: “Haurrek beharrezkoa dute natura. Berez zaie erakargarria. Naturarekiko kontaktuan, modu osasungarrian garatzen dira arlo guztietan: arlo fisikoan, emozionalean, mentalean, sozialean eta espiritualean. Aire zabalean eta biziarekiko interakzioan egotea (behintzat leku itxietan egoten diren bezain luzaro) haurren oinarrizko eskubidea izan (eta hala erabili) beharko litzateke gure gizarteetan. Hori lortzeko bidean inplikatzeko prest dauden pertsona, guraso eta hezitzaile guztiei zuzenduta dago liburu hau.”