Mireia Centeno psikologoa eta psikopedagogoa da eta haurtzaroaren inguruko hitzaldi eta tailer ezberdinak eman izan ditu azken urteetan. Aste honetan bertan Sabeletik Mundura ekimenak antolatuta online hitzaldi bat emango du haserrealdiak ezagutu eta hauen bidelagun izateko gakoak azalduz. Guk berarekin hitz egin dugu.

Argazkia: Urola Kostako Hitza

Kasketak haurra autonomoago bihurtzen hasten direnean hasten dira. Haurra Konturatzen da beraren beharrak jakinaraz ditzakela, baita inposatu ere, eta, beraz, adierazi egiten ditu.

Adin txikietan oraindik ez dute ikasi hau helduoi egokia iruditzen zaigun moduan egiten, ez dakite besteak errespetatuz egiten, ez dutelako enpatiarako gaitasunik garatu oraindik, eta kasketaldien edo haserreen bidez egiten dute.

Gure lana guraso moduan tresnak eskaintzea da, pixkanaka beraien beharrak eta erabakiak adierazi ahal izan ditzaten, besteak errespeta ditzaten.

Idatziz erraza ematen du, paperak edo pantailako testuak dena eusten duelako, baina gero errealitatea gainean lehertuko zaigu, ziur! eta gu geu ere lehertu gaitezke. Gauza bat argi izan behar dugu; Momentuan ahal izan dugun bezain ondo egin dugula, eta seguru zerbait ere ikasiko genuela. Zer diozue? zuen esperientziaren bat kontatu nahi duzue?