Erica Liquetek antzezten duen Sorgina Txirulina ipuin kontalariak, 4 eta 8 urte arteko umeei hidrogeno berdeaz hitz egin die Bergaran asteburuan. Ipuin kontalariak, bere zeharkako txirularen laguntzaz, ura, eguzkia, zura, gas naturala eta azukrea protagonista dituen istorioa aurkeztu die Laboratorium museora gerturatu diren 25 haurrei eta haien gurasoei. 

Klima larrialdiaren aurrean hidrogeno berdeak eskaintzen dituen aukeren berri ematea du helburu Laboratorium museoan dagoen Hidrogeno berdea. Klima aldaketaren konponbidea? izeneko erakusketak –horren baitan antolatu da ipuin kontalariaren ekintza–, eta, errealitate hori haurrei helarazteko bidea ematen du Sorgina Txirulinak.

Lurra zaintzearen garrantziaz jardun zen Erica Liquetek ordu eta erdiko saioan zehar, eta haurren parte-hartzea bilatu zuen uneoro: “Lurra gaixorik dago, zer egin genezake? Zuen gurasoek zer egiten dute zuen gaixotzen zaretenean?”, bezalako galderak eginda.

Larunbatean, berriro

Larunbatean, urtarrilaren 29an, 11:00etan eskainiko du bigarren emanaldia, Laboratoriumen bertan.

Ikusi lehenengo emanaldiko argazkiak behean.

Iturria: Goiena.eus.