Urtarrileko azken astean egin zen Bergarako Agirrebetxeberriko lur sailean Kukubaso elkartearen bigarren auzolan herrikoia. 330 haritz eta astigar landare landatu zituzten herriko  haur eta helduek.  Ez da ekintza berritzailea, zuhaitz landaketa ugari egin dira betidanik gure herrietan baina benetan aproposa iruditzen zaigu ikuspegi hezitzailetik eta balioan jarri nahi genituzke auzolan mota hauek.

Natura zaindu eta bertako basoak berreskuratu nahi dituen elkartea da Kukubaso.  Erraz  eta oinez sartzeko moduko lursaila eskuratu zuen  dohaintza bidez eta auzolana antolatu  familiei zuzendua.

Herriko elkarte batek deialdia egin eta herrian dauden  ikastetxeetako familia ezberdinek  elkarrekin lan egiteko izena ematea balioan jartzeko moduko lorpena dela iruditzen zaigu. 200 pertsona inguru bildu ziren  batera lan egin eta lur saila etorkizuneko baso bilakatzeko landaketa egitera.

Kukubaso elkartekoek mimoz prestatu zuten lur saila, materiala eta azalpena, familiei gonbidapen zuzena egin zitzaien eta erantzuna ederra izan zen.

Landaketa  haur eta familientzako ipuin kontaketa xume batekin amaitu zen, nahikoa  ekimenari amaiera polita emateko.

Ez al da hau Herria Hezitzailearen bidean sustatu beharreko ekintza mota? Ikastetxe ezberdinetako familiak elkarlanean, natura zaindu eta babesteko ekimen batean, gozamena oinarri eta herri mugimenduak sustatuta!